Shillong, Jylliew 03
U Myntri ba khmih ïa ka tnat Revenue & Disaster Management ka jylla, Bah Kyrmen Shylla, u la ong naba ka Meghalaya ka dei ka Jylla kaba jur bha u slap man u snem bad kumta dei ban bishar bha ha shwa ban shna bad tei ïa ki ïing ha ki jaka ba long riat bad jem ka khyndew.
Lah ban sakhi ba ka jingwan lynshop u ‘lapbah, ka ‘erïong, ki ju wanrah ïa ka jingtwa khyndew khamtam ha ki jaka ba long riat bad shong synjor ka khyndew bad ruh ka jingshlei um.
U Myntri u la ong, kum shi bynta ban ïada na ka jingshah ktah na ka jingtwa khyndew, ka donkam ïa ki paidbah ban bishar bniah shwa ïa ka jinglong jingman ka jaka, ka jingdon ki lum ki bym i shong skhem ha ka por ba mut shna ïing.
Namar kata, u Bah Kyrmen u la kyntu ïa ki nongshong shnong ka Jylla Meghalaya ban long kiba phikir, ban bishar bniah ïa ka jinglong jingman ka Jylla, ki lum, ki wah ha shuwa ban shna ïing.
Haba ïadei pat bad ka shnong Nongpriang kaba u la hiar jurip hi da lade ha ka Sngi Saitjaiñ, u Bah Kyrmen u la ong, “Hooid ka shnong ka don ha them Riat bad nga kyrpad ïa ki nongshong shnong ba ha ka por ba ki shna ïing lyngba ki skhim PMAY ne kano-kano ha ki sngi ban wan ba ki dei ban shna bha khnang ba kum kine ki jingjia hadien-habud kin nym jia shuh.”
U la ong ba ka jingwan pynjor ka bor mariang kam dei kaba lah ban ïathuh ne tip lypa, ka dei kaba lah ban jia hangno-hangno, namar kata donkam ban phikir ban lait na ka jingmynsaw.
Haba kylli halor ka jingïarap ban shna biang ïa ar tylli ki ïing ba shah pynjulor, u Myntri u la ong, “Kum ka tnat ka la don ïa ki kyndon bad ka la pynpoi ïa ki lad jingïarap katba lah. Ka tnat ka la pynpoi ruh ïa ka song pisa sha ki DC jong ki District ban leh ïa kaba donkam”.
