Jowai, Jylliew:
Ka Synjuk Waheh Chnong Jowai (SWCJ) ha ka 1 tarik Jylliew ka la pynlong da ka jingthung tynrai dieng ha ïing treikam u District Transport Officer, West Jaiñtia Hills kum shi bynta na jingleh burom ïa ka World Environment Day (WED) ka ban long ha ka 5 tarik u Jylliew.
Hashuwa ka jingthung dieng, ka la don ka jingïalang ba la pynïaid da u Bah Embhah Lyngdoh, Vice-President ka Synjuk, ha ka jingdonlang u Bah Requoman Rq. Laloo, General Secretary ka Synjuk.
Ki jingkren kyrpang shaphang ka jingdonkam ban thung ïa ki dieng bad ban ïada ïa ka mei mariang la kren da u Bah Lamphrang Pohktai, Executive Member ka Synjuk, Bah B. Japang, ACF-Social Forestry, Jowai Division, West Jaiñtia Hills District.
U Bah Eborlang Lyngdoh, District Transport Officer, West Jaiñtia Hills kum u kongsan u la ïathuh ïa ka jinglah jong ki nongshong shnong jong ka Bhutan ban burom bad kheiñ kor ïa ka mei mariang bad ki sawdong-sawkun khamtam ka jinglah jong ki ban pynneh-pynsah ïa ka jinglong khuid long kyntang ka wah kaba don hapdeng jong ka shnong.
Kumta u la kyntu ruh ïa ki nongshong shnong ka Jowai kiba don ïa ka Wah Myntdu kaba bsa umbam umdih ïa ki nongshong shnong ban wad ki lad ha kum kane ka juk ka por khnang ban lah ban pynneh-pynsah ïa ka jinglong khuid, long kyntang jong ka Wah Myntdu kumjuh ruh ïa kiwei ki bynta kiba ïadei bad ka jinglong-jingman jong ka mariang.
Ïa ka jingïalang la pynwai da ki kyntien khublei na u Bah D.H. Pde, Treasurer Synjuk Waheh Chnong, Jowai pynbud pat da ka jingthung ïa ki tynrai dieng.
