Shillong, Jylliew 03
Ki bor pynïaid ilekshon ka Jylla ki la pynpaw ïa ka jingsngewhun haba ïadei bad ki jingpynbit jingpynbiang kiba la pynkhreh na bynta ka sngi ñiew ‘vote’ jong ka ilekshon Lok Sabha ka ban long ha ka Sngi Ba-ar.
“Hooid, ngi la i hun ïa ki jingpynkhreh ha baroh ki jaka ñiew ‘vote’,” la ong u Chief Electoral Officer (CEO) ka Jylla, Dr. B.D.R. Tiwari haba kren sha ki lad pathai khubor hadien ka jingjurip ïa ka jaka ñiew ‘vote’ kaba ha Madan Polo, Shillong ha ka Lah Sngi U Blei.
U la ong ruh ba baroh ki jingdonkam ha ka liang ki bor pahara la dep pynbit pynbiang da ki bor pynïaid distrik bad ki bor pynïaid ha ki Sub-Division.
Haba kylli katno kynhun ki pulit CAPF kin don ha ka Sngi Ba-ar, u Dr. Tiwari u la ong ba ki bor pulit ki dap ki biang ym tang na bynta ki jaka ñiew ‘vote’, hynrei ban khmih ïa ka shongsuk-shongsaiñ bad kiwei-kiwei ki bynta.
Haba kdew ba ka jingñiew ‘vote’ kan sdang ha ka por 8 baje mynstep, u CEO u la ong, “Kumba ka long, ka jingñiew ‘vote’ kan sdang ha ki jaka ñiew ‘vote’ u Returning Officer (RO) ha ka por 8 baje mynstep. Ha ki jaka ñiew ‘vote’ u RO ha Shillong bad Tura, ka jingñiew ‘vote’ lyngba ki kor EVM kan sdang ha ka por 8 shiteng.”
U la ïathuh ba ha kiwei-kiwei ki jaka ruh ka jingñiew ‘vote’ kan sdang ha ka por 8 baje mynstep bad ki jingpynbit jingpynbiang la dep ban pynkhreh nalor kiwei-kiwei ki jingdonkam.
“Ngi kyrmen ba shen mar sien dep ka jingñiew ‘vote’, hadien ka jingbud ryntih ïa baroh kiba dei ban leh, ki RO kin sa pynbna ïa ka risol,” u la ong.
Haba jubab, u la ong ba wat la ka kham don jingeh khyndiat ha Shillong, hynrei ha ryngkat ki jingtei ba la shna shipor lem bad ki bor pahara ba donkam kiba la pynkhreh, baroh ki biang lut nadong-shadong.
U la ong ruh ba ka jingñiew ‘vote’ kan long kumba ju long hashuwa, bad ka kynhun ka la shemphang bad ki jingpynkhreh ki long kiba bit ba biang katkum ka jingbthah ka ECI.
Halor ki jingeh, u la ong, “Namar ngim don ïa ka jaka ñiew ‘vote’ kaba neh bad pura, kumta ngin hap shna ïa ki jingshna ba shi por, ha kajuh ka por u slap, kane ruh ka long kawei na ki jingeh. Wat la katta, ngi la sakhi ïa ki jingpynkhreh na ka liang u RO ka Shillong lem bad ka kynhun jong u bad ka long ka jingpynkhreh kaba bit ba biang ha baroh ki liang bad ngi la hun.”
Na ka liang Chief Secretary ka Jylla, Bah D.P. Wahlang uba la wan poi lang ha katei ka jaka u la ong ba ki kam ba la pyntyllun da u RO ki ïaid shaid-shaid bad u kyrmen skhem ba ka jingñiew ‘vote’ kan long kaba ïaid beit ïaid ryntih.
Shuh shuh u la bynrap, “Ki bor pahara ki long kiba bit ba biang. Nga la ïakren bad u SP ka distrik bad la pynhkreh ruh ïa ki bor pahara ha kane ka jaka bad ngi la hun ïa ki jingpynkhreh.”
