Jowai, Jylliew 03
Uwei na kiba shitom na ka jingbam ïa u tit khlaw, ha ka 3 tarik Jylliew u la ïoh ban mih noh napoh ka jaka sumar hadien ba u la ïoh ïa ka met kaba koit kaba khiah.
Une uba la koit noh la tip kum u Shanmi Chympa bad u shah sumar hapoh Jowai Civil Hospital, Ialong.
U Ribaitki Shadap uba shah sumar ha kajuh ka Hospital ha Civil Ialong, la pynkynriah noh ïa u sha Nazareth Hospital Shillong ha ka janmiet jong ka Sngi Nyngkong hadien ba la ban jur ka jingshitom.
Lah ban pynkynmaw ba kane ka jingbam tit ka la jia ha ka shnong Saphai, West Jaiñtia Hills kaba la shim ïa ka jingim jong 4 ngut kiba kynthup lai ngut ki khynnah rit bad kawei ka longkmie.
Kiba dang don mynta hapdeng ka jingsumar ki long u Obar Sutnga (70 snem) bad Nidawan Kanai (12 snem) kiba shah sumar ha NEIGRIHMS, Shillong.
Katba ha Nazareth Hospital, Shillong ki long ka Kong Jumonlang Suchiang lem bad u khun ba dang 11 snem.
