Nongpoh, Jylliew 03
Kumba san ngut ki briew na ka shnong Saiden ha Ri Bhoi District ba kynthup ïa lai ngut ki heprit ki la kem pang kynsan hadien ba bam ïa u tit khlaw uba ki la wanrah na ka shnong Umran. Kine kiba la kem pang ki kynthup ïa kawei ka longkmie bad saw ngut ki khun, ha kaba lai ngut, ki dei kiba dang hapoh 18 snem ka rta.
Katkum ka khubor ba la ïohlum, la ïathuh ba kane ka la jia ha ka miet Sngi U Blei ha ka por kumba 8 baje eiei ha ka dong Nongkyndang jong ka shnong Saiden ha kaba katei ka longïing ka la shet ïa utei u tit khlaw na ka bynta ban bam ja miet.
La ïathuh ba hadien ka jingdep bam ïa utei u tit khlaw, kitei ki san ngut ki la sdang ban kem pang, kynroi prie bad ïoh jingshit uwei hadien uwei naduh ka por kumba 10 baje shaneng.
Ïa kine baroh san ngut la tip kyrteng kum ka Larita Syiemlieh (kmie) bad ki khun ki kynthup ïa u Wanphrangsngi Syiemlieh (23), u Daniki Syiemlieh (16), ka Larikynti Syiemlieh (14) bad u Da-u-Rijied Syiemlieh (3), la pynkit noh mar-mar sha Civil Hospital Nongpoh na ka bynta ban pynïoh jingsumar, katba ar ngut kiba kynthup ïa katei ka kmie bad u Daniki Syiemlieh la rah noh sha Bethany Hospital Nongpoh namar ka jingjur jong ka jingshitom.
