Shillong, Jylliew 03
U Returning Officer (RO) ka 1-Shillong Parliamentary konstitwensi uba dei ruh u Deputy Commissioner ka East Khasi Hills, u S.C. Sadhu ha ka Lah Sngi U Blei u la kren shai ba ki jingïaid paidbah hadien ka jingñiew ‘vote’ kim dei ban pynthut satia ïa ka shongsuk-shongsaiñ.
Halor ka jingpynjynsur ïa ka kyndon 144 CrPC, u RO u la ong, “Ha ka jingïakren bad ki seng saiñ pyrthei lem bad ki kyrtong, ngi la bthah sha ki ba ki dei ban phah ha shuwa sha ngi ïa ka lynti ïaid jong ki na bynta ka jingïaid paidbah.”
U la ong ruh ba kin hap buh ïa ki ‘Volunteer’ kiba biang na ka liang jong ki, ha kajuh ka por ban bthah sha ki (Volunteer) ha ka ban pyntikna ba ka jingïaid paidbah kam dei ban pynthut ïa kiwei ne ïalam sha kano-kano ka jingthut ha ka shongsuk shongsaiñ.
U DC u la ïathuh ba hadien ba la pynmih ïa ka hukum halor ka 144 CrPC, ki bor distrik ki la dep ïakren bad kiba bun balang kynthup ki seng saiñ pyrthei, kynhun seng, khlieh nongïalam shnong, ha kaba ki la phah jingthoh bad pynsngew ban pynjynsur noh ïa ka kyndon halor ka jingïaid paidbah.
“Hadien ba la ïakren bad ki, ngi la pyrkhat ban pynjynsur, ha kajuh ka por, ngi la kyrpad ruh lyngba jong ki ban pyntikna ba ka jingïaid paidbah kam dei ban ïalam ne ktah pat ïa ka shongsuk-shongsaiñ. Na ka liang ki seng bad ki kyrtong, ki la kular ha ngi ban shim ki sienjam na ka liang jong ki khnang ban ym mih kano-kano ka jingjia,” u la ong.
Haba ïadei bad ka jingñiew ‘vote’, u Sadhu u la ong ba la pynbit-pynbiang ïa baroh ki jiingpynkhreh ban pyntikna ba ka jingñiew ‘vote’ kan long kaba ïaid beit ïaid ryntih bad kaba khuid ba suba da kaba kynthup lang ïa baroh ki seng saiñ pyrthei.
“Haba phai pat sha ka shongsuk-shongsaiñ, ngi la pynbiang ïa ki jingpynkhreh ban pyntikna ba yn ym shah ïano-ïano ruh (u bym ïoh jingbit) ban rung ha ki sawdong-sawkun jong ka jaka ñiew ‘vote’,” u la ong.
Nalor kane, u la ong ba wat la dep pynjynsur ïa ki kyndon jong ka hukum 144 CrPC haba ïadei bad ki jingïaid paidbah, kiwei-kiwei ki kyndon jong katei ka hukum kin neh kumjuh.
“La leh ïa kane ban pyntikna khnang ba yn ym don ki bor ba nabar ne ‘riew shimet ki ban pynthut ha ka por ba ñiew ‘vote’,” u la ong.
Ïa ka kyndon 144 CrPC yn pyntreikam hapoh ki sawdong-sawkun jong ka jaka ñiew ‘vote’.
Haba kylli, u la ong ba la pynkhreh ïa ki bor pahara, ha kaba ïa ki bynta ba shapoh jong ka jaka ñiew ‘vote’ yn khmih da ki pulit CAPF katba ïa kiba shabar, yn pahara da ki pulit ka Jylla.
Shuh shuh u la bynrap, “Ha ki bynta ba shabar jong ka jaka ñiew ‘vote’, yn ym shah ïeng kali, yn ym shah ïa ki kali ban rung ha ki bynta ki 3 kyrdan jong ki bor pahara, hynrei tang ïa ki kali ba don ïa ki ‘Pass’.”
