Shillong, Jylliew 03
Ki pulit pynïaid kali ha Shillong lane Shillong Traffic Police (STP) ha ka Lah Sngi U Blei ka la pyntip ba uba ñiah ïa kawei ka ar shaka ha ka rukom kaba la buh jingma ïalade bad ïa kiwei ha ki khyndiat sngi ba la dep u dei u Home Guard Volunteer bad u dei uba la shoh khawiang ha ka por ba u la ñiah ïa ka ar shaka.
Haba pyntip ïa kane ha sla ‘Facebook’, ki pulit ki la ong ba ïa utei u Home Guard Volunteer la weng noh na ka kam ban pynïaid kali hadien ba ka la paw ba u la don hapdeng ka jingshoh khawiang ha ka por ba u la ñiah ïa ka ar shaka.
Lah ban kdew ba ki la don ki ‘riew paidbah kiba la ïoh ring dur ha kine ki khyndiat sngi ïa uwei u briew uba la ñiah ïa ka ar shaka ha ka rukom kaba buh jingma ïalade bad ïa kiwei. Ha ka ‘jacket’ kaba u la phong da utei Home Guard Volunteer, nadien la thoh ïa ki dak ‘Shillong Traffic Police’.
Ïa katei ka jingring dur la leh ha ki thaiñ Jaïaw wat la ïa ka tarik ba thikna ym pat lah ban tip.
