Shillong, Jylliew 03
Ka jingñiew ‘vote’ na ka bynta ka ilekshon Lok Sabha ha Shillong Parliamentary konstitwensi bad Tura Parliamentary konstitwensi kan long ha ka Sngi Ba-ar ha kaba yn rai ïa ki nongjop ki ban leit mihkhmat na kane ka Jylla sha ka Ïingdorbar Thawaiñ jong ka ri.
Ka jingñiew ‘vote’ kan sdang naduh ka por 8 baje mynstep bad la antad ba kan kham shimpor ban pynbna ïa ki nongjop namar hap ban kheiñlang ïa ki ‘vote’ kiba la dep ñiew na baroh ki jaka ñiew ‘vote’.
Ha Shillong konstitwensi ki don 8 tylli baroh ki jaka ñiew ‘vote’ kiba kynthup ha 7 tylli ki district bad kawei ha Sohra Civil Sub Division. Ka jaka ñiew ‘vote’ ha nongbah Shillong ka dei kaba heh tam ha kaba yn ñiew ïa ki ‘vote’ na 15 tylli ki MLA konstitwensi.
Kane ka ilekshon kan rai la u MP ka Congress na Shillong konstitwensi u Bah Vincent H Pala bad ka MP ka NPP na Tura konstitwensi ka Agatha K Sangma, kin dang shahjied biang ne em ban leit mihkhmat sha Parliament.
Ka jingïakhun ha Shillong konstitwensi ka dei hapdeng ki 6 ngut ki kyrtong bad ha Tura ka jingïakhun ka long hapdeng 4 ngut ki kyrtong.
Na ki 14,00,411 ngut ki nongthep ‘vote’ ha Shillong konstitwensi, kiba poi thep ‘vote’ ki long 10,33,249 ngut katba na ki 8,26,156 ngut ki nong thep ‘vote’ ha Tura parliamentary konstitwensi, kiba poi thep ‘vote’ ki long 6,72,286 ngut.
Ka jingpoi thep ‘vote’ ha Shillong konstitwensi ka long 73.78% ha Tura ka long 81.37% bad lada kheiñlang ha baroh ar tylli ki konstitwensi ka jingpoi thep ‘vote’ ki paidbah ka long 76.60%.
Ka jingñiew ‘vote’ na ka bynta kane ka ilekshon Lok Sabha kaba la pynlong haduh hynñiew wat kynthup ha kylleng ka ri India.
Ka jingkhmih lynti na kane ka ilekshon ka long ba ka NDA hapoh ka jingïalam ka BJP, kan wanphai biang ha ka bor synshar bad ka Kynhun INDIA kaba lamkhmat da ka Congress ruh ka pynpaw ka jingsngew skhem ba kan ïoh ban thaw Sorkar ban ïalam ïa ka ri ha kane ka sien kaba mynta.
