Shillong, Jylliew 03
Ka Hynñiewtrep Integra-ted Territorial Organisation (HITO) Sengkmie ha ka miet jong ka 3 tarik u Jylliew 2024 ha ryngkat ka jingïadonlang ki bor pulit jong ka Hima Mylliem ha ka sien ba ar ki la leit ban jurip kyndit-kynsan ïa ki dukan kiba don ha Ïewduh ban lap la ki don ne em ki briew kiba ju sah miet hapoh ki dukan.
Ka seng ha ka jingjurip ka la lap ba kumba 5 tylli ki dukan die sha kiba peit da ki bar jylla ki la pynkheiñ ïa ka hukum kaba la pynmih da ka District Council ba hapoh ka 10 baje mynmiet, baroh ki dukan ki dei ban khang bad ym shah satia ïano-ïano ban sah miet hapoh kitei ki dukan kiba don ha Ïew.
Ka seng lyngba u President, Bah Donbok Dkhar haba ai jingkren u la ai jingmut ïa ka District Council ba ïa kine ki briew kiba pynkheiñ ïa ka hukum jong ka Council ym dei shuh ban ai ïa ka NOC ban pynthymmai ïa ka laisen treikam jong ki bad u la ong ruh ba ka seng kam kwah ba ka Ïew kan kylla long kum ka Them Metor 2.0.
“Ngi kyntu ruh ïa ka District Council bad ïa ka ophis jong u Syiem ka Hima Mylliem ba ïa kine kiba leh be-aiñ bad kiba leh tam ïa ka hukum, ym dei shuh ban shah ïa ki ban ai ïa ka NOC ban pynthymmai ïa ka laisen jong ki. Ngim kwah ba ïa kane ka Ïew ba kan kylla long kata ka Them Metor 2.0”, la ong u Bah Donbok.
U Bah Donbok u la ïathuh ba ki dukan kiba la pynkheiñ ïa ka aiñ ha ka jinglap jong ka seng ki don 5 tylli bad na ka liang ka seng ka la ïoh ïa ki kyrteng ki trai jong kitei ki dukan. Kumta na ka liang ka Hima kan sa khot ban hajir ïa kitei ki briew bad lada ka long kaba donkam ban pynduh wat ïa ka laisen jong kitei ki briew yn pynduh katkum ka jingpynkheiñ ïa ka hukum.
Shuh shuh u la ong ruh ba ka seng ha ka jingjurip ka la beh noh ïa ki bar jylla kiba wan sah miet ha Ïewduh. Ha ka sngi kaba bud ka seng kan sa buddien ïa ki dukan ki bym nud shuh ban plie ha ka por ba ka seng ka la wan ban jurip ban khmih la ki don ne em ki jaka thiah hapoh ki dukan. Nalor nangta u la ong ruh ba ki don kiba sah miet ha Ïewduh, hynrei namar ba ki la ïoh jingtip kham ha shwa ban wan jurip da ka seng, kumta bran-bran ki la phet krad noh.
U Bah Donbok u la phah da ka khubor ruh sha kitei ki bar jylla kiba sah ha kitei ki dukan ba kim dei ban ai daw ba ki hap ban sah hapoh dukan tang namar ba ki trei ha ki dukan bam. Hynrei, kum ki nongtrei kiba kwah ban trei minot ki dei ban khie dangstep bad ban pyndep ïa ka kamram ym ban ai daw da kumne-kumtei.
U Bah Donbok u la ong ba ha katei ka jingjurip jong ka seng ka khlem lap satia ïa ki Khasi ki ban sah ha ki dukan ha Ïew, hynrei ki don tang ki bar jylla suda bad ki bym don satia ïa ki kot ki sla kiba biang.
