Shillong, Jylliew 03
Ka khubor ba la ïohlum na ki pulit ha ka Lah Sngi U Blei ka ïathuh ba uwei u nongshong shnong ïa uba la tip kyrteng kum u Jilet Star Nongrum u la ujor ba arngut ki briew ba la tip kum u Meurizio Marbañiang bad u Balajied Skhem Kharsohnoh ki la pyndonkam be-aiñ ïa ka nombor kali jong u (ML-05H-3045) ha kawei pat ka kali kaba dei ka taksi.
Ha kawei pat ka khubor, ka Shila Devi Hajong ka la ujor ba ha ka 26 bad 28 tarik Jymmang, ki runar ki la prong ïa ka ïing sah jong ka kaba don ha Madan Laban, Shillong bad ki la tuh ïa ki ksiar ki ksah ba shongdor kumba T. 60,000, rupa ba shongdor kumba T. 5,000, kawei ka ‘Laptop’ ba shongdor kumba T. 48,000 bad kawei ka baje kti.
Shuh shuh ka khubor na ki pulit ka ïathuh ba u Head-Service Operation Customer Experience Department, M/s Bharti Hexacom Ltd., (Airtel), Laitumkhrah, u la ujor ba ha ka por ba la pynlong ïa ka jingpeit bniah (CAF Audit) ha u bnai Jymmang 2024, la shem ba saw tylli ki ‘Mobile Connection’ ki la pyndonkam da ki kot ki sla kiba thok ban ai sha ka kompani ban ïoh ïa ki nombor Airtel. Namarkata, ïa ka jingtreikam jong kine ki nombor la hap ban pynsangeh noh.
