Nongpoh, Jylliew 03
U Deputy Commissioner (DC) ka Ri Bhoi District, u Arpit Upadhyaya ha ka Sngi Nyngkong u la pynjari da ka kyndon 144 CrPC ha baroh kawei ka Ri-Bhoi District.
Shi sngi shwa ka jingñiew ïa ki ‘vote’ na ka bynta ka ilekshon Lok Sabha, u Deputy Commissioner (DC) ka Ri Bhoi District ha ka Sngi Nyngkong u la lum jingïalang ïa baroh ki nongïalam jong ki seng saiñ hima-sima bapher bapher ha ka jingïadon ryngkat jong ki Electoral Registration Officer (ERO), ki Assistant Electoral Registration Officer (AERO) lem bad kiwei kiwei ki ophisar ban ïakren halor ka jingdonkam ban pynneh ïa ka shongsuk shongsaiñ na ka bynta ka jingïaid beit ïaid ryntih jong ka jingñiew ïa ki ‘vote’ lashai ka sngi.
Ïa kane ka jingïalang la pynlong ha ka kamra jingïalang jong ka ophis u DC ka Ri Bhoi District ha kaba na ka liang ki bor pynïaid jong ka district ki la ïoh ruh ban pynshai sha ki nongïalam jong ki seng saiñ hima-sima halor ki jingdonkam kiba ki seng saiñ hima-sima ki hap ban bud ryntih hapoh ka jaka ñiew ‘vote’ ha Indoor Sports Stadium kaba don ha ka shnong Umlyngkdait.
Ha kane ka sngi, u DC u la bthah ruh ïa ki nongïalam jong ki seng saiñ hima-sima bad ruh ïa ki paidbah nongkyrshan ba kim dei satia ban pynmih ïa kano-kano ka huri-hura ha katei ka sngi ñiew ‘vote’, da kaba pynkynmaw ruh ba la pynjari ïa ka kyndon 144 CrPC ha baroh kawei ka district ban khang pyrshah na ka bynta ban pynlong ïa ka jingïalang lehkmen paidbah khlem da ïoh jingbit na ki bor pynïaid district.
