Shillong, Jylliew 03
Ka ‘Overseas Nursing Job Fair’ kaba la long ha u snem ba la dep ka la wanrah jingkylla ha ka jingim jong 27 ngut ki nos na Meghalaya kiba long ba la khreh ban sdang ïa ka jingïaid lynti ha ka jingshakri jong ki ha Japan hadien ba ki la pyndep ïa ka jingshah hikai ha ka ktien ‘Japanese’.
Ha ryngkat kane ka sap kren bathymmai jong ki, kine ki nos kin shah thung kam ha ki jaka sumar bapher-bapher bad ‘Care Home’ kiba ha Japan.
Kum shi bynta jong ka skhim “Skills Meghalaya”, ka Sorkar Jylla ka kyrshan pisa ?50,000 na bynta kawei-kawei ka kyrtong lyngba ka Meghalaya State Skill Development Society (MSSDS). Kane ka jingkyrshan ka buh thong ïa 300 ngut ki nos ha kine ki snem ban wan.
U Myntri Rangbah ka Jylla, u Conrad K. Sangma u la ïakynduh ïa ki nonghikai bad ki samla pule kiba ïadon bynta ha kane ka sienjam.
Haba pynpaw ïa ka jingsngewsarong, u la ong, “Ka long ka burom ban ïohi ba ki nos napoh ka Jylla ki mih ban shakri briew shabar ri. Ngi phah ki jingkyrkhu-jingkyrdoh sha ki bad kyrmen ban ïohsngew ïa ki khana kiba seisoh shaphang jong ki. Nga kyntu ruh ïa kiwei ban wan shakhmat bad shim kane ka lad ka bym tang ban kamai shabar, hynrei ban kyntiew ruh ïa ka jingnang-jingtip bad ka lawei jong ki.”
Kumba 27 ngut ki nos ki la pynrung kyrteng bad ka NAVIS ban shah hikai ha ka liang ka ktien ka thylliej bad lariti ha Bengaluru.
Kaba sngewtynnad ka long ba 25 ngut na ki, ki la seisoh ha ka eksamin N4 bad N5 ha ka sien shong banyngkong bad ki la shah tyrwa kam.
San ngut na ki nos ki la ïoh pdiang ïa ka ‘Visa’, bad 2 ngut ki la leit sha Japan ha ka 27 tarik u Jymmang. Mynta yn ap sa ïa ki’Visa’ kiba dang sah.
Sa 14 ngut kiwei pat (ki nos) ki la shah thung kam ha ki shlem ai jinghikai bapher-bapher ha Singapore kaba dei lyngba kawei pat ka ‘agency’. Kin sa pynïasoh hapoh kine ki 3 bnai.
Ïa ka jingai jinghikai la shim da 10 ngut ki nonghikai ‘Japanese’ ha NAVIS, bad wat hapdeng ka jingjwat ban nang ïa ka ktien bathymmai, ki samla pule ki la shem ba kane ka jinghikai ka la pynmyntoi shi kat dei ïa ki.
Ka jingjied ïa kine ki nos ka la long hadien ka ‘Overseas Nursing Job Fair’ kaba la long ha u Nailar 2023, kaba la sakhi ïa ka jingïashim bynta jong kumba 1000 ngut kiba la pynrung kyrteng na kylleng ka Jylla.
Shuh shuh la pynithuh ïa 4 tylli ki kompeni ba kynthup ïa ka NAVIS. Nalor kane, la soi ruh ïa ka soskular ka jingïateh bad kine ki kompeni ha ka 7 tarik Nohprah, 2023, ban ïarap ha ka liang ka jingai jinghikai ha ka ktien ka thylliej bad jingthung kam ha ki ri kum ha Japan, UK, Singapore, bad UAE.
