New Delhi, Jylliew 03 (UNI)
Ka India ka la thaw ïa ka ‘World Record’ hadien ba 64.2 klur ngut ki nongthep ‘vote’, ba kynthup ïa 31.2 klur ngut ki kynthei, ki la ïashim bynta ha ka ilekshon MP Lok Sabha mynta u snem, la ong u Chief Election Commissioner (CEC), u Rajiv Kumar, ha ka Lah Sngi U Blei.
Haba kren sha ki lad pathai khubor shi sngi shwa ban ñiew ïa ki ‘vote’, u Kumar u la ong, “Kane ka dei ka ban sah kynmaw na ka bynta jong ngi. Kane ka jingwan thep ‘vote’ ki nongshong shnong ka long 1.5 shah ban ïa baroh ki nongthep ‘vote’ kiba don ha ka Ri US, UK, France, Germany, Italy, Japan bad Canada. Ngi ïanujor ïa ki nongthep ‘vote’, bad ngi kham bun da 2.5 shah ban ïa ki nongthep ‘vote’ ha ki 27 tylli ki Ri kiba don ha ka European Union (EU).”
Nalorkata, u la ïathuh ba ki la don 68,000 tylli ki kynhun, 1.5 klur ngut ki nongpynïaid ilekshon bad ki bor pahara kiba la ïadon bynta ha kane ka ilekshon Lok Sabha mynta u snem.
Shuh shuh u Kumar u la ong ba la pyndonkam la jan 4 lak tylli ki kali, 135 tylli ki rel, bad la pyndonkam 1,692 sien ka jingpynher liengsuiñ ha kane ka ilekshon Lok Sabha.
“Ngi la ïoh ruh ban kurup ïa ka pisa kaba la kot sha ka T. 10,000 klur, bad kane ka la long lai shah ban ïa kaei kaba ngi la kurup ha u snem 2019,” la ong u CEC.
Ka jingthep ‘vote’ kaba la long haduh hynñiew bynta ban jied ïa ki MP sha ka Lok Sabha kaba 18 ka la sdang ha ka 19 tarik Ïaïong bad ka la kut ha ka 1 tarik Jylliew. Ka jingñiew ïa ki ‘vote’ kan long lashai ka sngi ha baroh kawei ka Ri.
Na ka liang u CEC u la pyntip ba la pyndonkam ban thep ‘vote’ biang tang ha ki 39 tylli ki jaka haba ïanujor bad ki 540 tylli ki jaka ha ka ilekshon ha u snem 2019.
