Shillong, Jylliew 04
U President ka Voice of the People Party (VPP), Bah Ardent Miller Basaïawmoit uba dei ruh u MLA ka Nongkrem, u la pyntip ba ka seng kan sa pynlong ïa ka jingïalang ai khublei jingjop ha ka 8 tarik mynta u bnai ha ka por 11:00 baje mynstep ha Smit.
Kane ka jingpynpaw u Bah Ardent ka dei haba u kren ban ai khublei ïa ki paidbah najrong kali haba la poi ha Golflink hadien ba la mih na Polo ban leit synran ïa u MP ka seng uba la ïoh jingjop u Dr. Ricky AJ Syngkon sha ïing sah jong u ha Nongsder, Ri Bhoi district da kaba ïaid na Mawlai Mawroh, Stand Bus, Mawlai Pump sha Mawïong lyngba ka jingkieng Umïam ban poi sha Nongsder.
U Bah Ardent u la pyntip ba kane ka jingïalang jingjop ha ka 8 tarik mynta u bnai Jylliew ha ka por 11 baje mynstep ha Smit ka long khnang ba baroh ki nongkyrshan na kylleng ka bri u hynñiewtrep kin poi lut namar mynta ka sngi kim shym la poi lut namar ki la leit ñiew ‘vote’ ha man ki district.
Nalor nangta, u la kyntu ïa ki nongkyrshan ba kin long kiba skhem jingmut namar ba kiwei ki seng saiñpyrthei kin sa ïalam bakla ïa ki paidbah hadien ba ka VPP ka la jop ïa ka ilekshon MP Lok Sabha hynrei ka seng kan nym shet kylla.
Ha kajuh ka por u la ong ba mynta ka seng kan pynsngewthuh ruh ïa kito ki bym pat kyrshan ba kin wan ban kyrshan noh ïa ka VPP khnang ba ka seng kan ïoh ban synshar ha District Council bad ïa ka jylla baroh kawei.
Hadien ba u Bah Ardent u la dep ai jingkren, ki nongkyrshan ka VPP ki la synranlang ïa u Dr. Ricky AJ Syngkon ban leit sha ïingsah jong u ha Nongsder.
La ïohi ba ki nongkyrshan ki ïeng harud surok ban pdiang burom haba u Dr Ricky u la shong da ka kali ban ïaid lynti na Polo sha Mawlai Mawroh, Stand Bus, Petrol pump, Mawïong shaduh Nongsder.
Ha kane ka jingïaid lynti la synran lang da ki pulit bud sa ki nongkyrshan kiba ïaid da ka kjat, kiba shong da ki ar shaka, ki kali kiba la teh da ki lama ha ka shap jong u prah.
Haba u nonglum khubor jong U Nongsaiñ Hima u la ïaid lang ban lum khubor, la ïohi ba ki don ki nongkyrshan kiba la shong wat hajrong ka kali kit um, nangta haba la poi ha Mawroh la ïohi ba ki don ki nongkyrshan kiba la ïeng harud surok ban shad ban rah syndon ban kaweh da u prah.
