Shillong, Jylliew 04
Ka Congress ha Meghalaya ka la thaw ar tylli ki khana hadien ka jingñiew ‘vote’ na ka bynta ka ilekshon MP ha ka Sngi Ba-ar ha kaba kane ka seng saiñ pyrthei kaba la rim tam ha India ka la thaw khana ba ka la rem noh na Shillong parliamentary konstitwensi hadien 26 snem. Katba sa kawei pat ka khana ka long ba ka Congress ka la knieh noh ïa ka jinglong MP na ka longïing u nongïalam ba paw ka jylla bad ka ri, u Purno Agitok Sangma (ba la khlad noh) kaba la bat palat 40 snem.
Ka Shillong parliamentary konstitwensi ka ju dei ka konstitwensi ba ka Congress ka ju jop bad phah MP la bun phew snem sha ka Ïingdorbar Thawaiñ Lok Sabha. Ka Congress ka la jop na Shillong khlem pat shah rem naduh u snem 1998 lyngba u Bah PR Kyndiah (ba la khlad noh) bad ynda la mih u Bah Vincent H Pala kum u kyrtong naduh u snem 2009 ter ter haduh 2024.
Hynrei kane ka jingrem ka Congress bad u Bah Vincent H Pala ha ka ilekshon MP na Shillong ha une u snem 2024, ka dei hadien 26 snem naduh u snem 1998.
Haba phai sha ka Rilum Garo, ka jingrem noh ka Agatha Kongkal Sangma na Tura ha kane ka ilekshon Lok Sabha mynta u snem 2024 ka dei ka khana pateng la pateng ha ka saiñ sima sima ha kaba ka longïing jong u Purno Agitok Sangma ka mad ïa ka jingrem ha ka sien banyngkong namar hadien palat 40 snem kane ka longïing ka duh ban phah nongthaw aiñ sha Parliament.
Ki paidbah ka Rilum Garo naduh u snem 1977 ter ter ki la phah beit tang na ka longïing jong u Purno Agitok Sangma ban leit sha ka ïingdorbar Thawaiñ Lok Sabha na Tura Lok Sabha konstitwensi. Ka jingsdang ban shahjied MP ka dei naduh u Purno uba la jop nyngkong eh na Tura kum u kyrtong ka Congress ha u snem 1977 ter ter haduh u snem 1998.
Dei tang ha u snem 1989 ba u Purno u la pynïakhun noh da u Sanford Marak uba la jop kum u kyrtong ka Congress ha ka ilekshon MP na Tura ha u snem 1989 hadien ba ka AICC ka la phah ïa u Purno ban wan noh sha ka Jylla ban shimti kum u Myntri Rangbah ha u snem 1988. Haba u Purno u la leit phai sha Parliament, u la shahjied biang kum u MP na Tura ha ka ilekshon ha u snem 1991. Lada kheiñ tang naduh u snem 1991 haduh 2024, ka long hadien 33 snem ba ka longïing u Purno kan duh ban phah MP sha ïingdorbar Lok Sabha, hynrei haba kheiñ naduh u snem 1977, ka long 42 snem.
Hynrei kane ka la bteng wat hadien ba u Purno u la mih noh na ka Congress ha u snem 1999 ha kaba ki paidbah ki dang jied ïa u kum u MP na Tura. Kane ka la ïai bteng wat haba u Purno u la sei sa da ki khun jong u ban ïakhun ha ka ilekshon Lok Sabha na Tura ha ki snem kiba bud.
Ha ka por ba u Purno u la wanphai noh sha ka saiñ pyrthei ha kane Jylla ha u snem 2008, ka la don ka ilekshon MP shiteng samoi ha kaba u la pynïakhun da ka Agatha K Sangma kaba ka la shahjied bad ïoh ïa ka nam kum ka MP kaba khynnah tam ha India bad bteng ban jop biang ha ka ilekshon MP ha u snem 2009. Hynrei u Purno u la ïakhun hi biang ïa ka ilekshon MP na Tura ha u snem 2014 ha kaba u la jop biang ha ka sien kaba khyndai, hynrei u la khlad noh ha ka 4 tarik Lber, 2016. Kumta ynda la pynlong ïa ka ilekshon MP shiteng samoi, la mih sa u Conrad Kongkal Sangma bad u la shahjied kum u MP sha ka ïingdorbar Thawaiñ Lok Sabha na Tura konstitwensi ha u snem 2016.
Shuh shuh ynda u Conrad u la wan ban shimti kum u Myntri Rangbah ka Jylla ha u snem 2018, ka Agatha Kongkal Sangma ka la ïakhun biang ïa ka ilekshon MP ha u snem 2019 bad ka la shahjied biang kum ka MP ha ka sien basaw na Tura.
Kumta dei ha kane ilekshon MP mynta u snem 2024 ba ka Congress lyngba u Saleng A Sangma ka la ïoh ban thaw ïa kane ka khana kaba long ka jingjop bad ha kajuh ka por ka jinglah ban knieh ïa ka jinglong MP na ka longïing u Purno kaba la bat la bun phew snem naduh ba u Purno u la shahjied nyngkong eh kum u MP na Tura ha u snem 1977, hadien ba u la rung sha ka saiñ hima ha u snem 1975.
