Shillong, Jylliew 04
Hadien ba ka Voice of the People Party (VPP) ka la ïoh ïa ka jingjop na Shillong Parliamentary Constituency ha ka ilekshon sha ka ïingdobar thawaiñ Lok Sabha, u nongïalam ba rangbah ka seng, u Bah Ardent Miller Basaïawmoit u la ong ba ïa mynta ka seng kam pat lah satia ban ai ïa ka jubab bad kano ka kynhun ha Delhi ka VPP kan leit ban ïasynroplang.
Haba jubab halor ka jingkylli ba ka seng VPP kan leit ïasynroplang bad kano ka kynhun ha Delhi la kan leit synrop bad ka National Democratic Alliance (NDA) kaba la ïalam da ka Bharatiya Janata Party (BJP) ne bad ka kynhun I.N.D.I.A kaba la ïalam da ka seng Congress, u Bah Ardent u la ong ba kum ka seng kam pat kwah ban jubab ïa kane ka jingkylli namar kin sa dang don ki jingïakynduh lang ha kaba kum ka seng kan sa shim ïa ki sienjam.
“Kata ka dei kawei ka jingkylli kaba ngim pat da sngew donkam eh ban jubab mynta namar ngin dang ïakynduh kum ka seng ban ïashong kyrkieh kum kaei pat ka sienjam kaba ngin shim kum ka seng”, la ong u Bah Ardent.
Utei u nongïalam ka VPP u la shim ruh ïa ka lad ban ai khublei ïa ki paidbah kiba la don ryngkat bad shaniah ïa ki nongïalam jong ka seng naduh kaba sdang.
U la ong ruh ba u sngewkmen hadien ba la ïoh ïa ka jingtip ba u kyrtong jong ka seng, u Dr Ricky A.J Syngkon u la jop bad kumba la kren bad pynsngew sha ki paidbah, ka seng kan ïai bteng ban rah ïa ki mat ban pyrshah ïa ka kam bamsap, ka jingïakhun ïa ka jingduk, ka jingleh shiliang khmat ha ka imlang ka sahlang bad kiwei-kiwei.
“Ngin rah ïa ki mat kumba ngi la dep ban kular ha u paidbah bad kawei na kita ka dei ka jingpyrshah ïa ka bamsap, kaba ar ka dei ka jingleh thma pyrshah ïa ka jingduk nangta ka jingleh shiliang khmat hapoh ka imlang-sahlang”, la ong u Bah Ardent.
U Bah Ardent u la ong ruh ba ki mat baroh kiba ka seng ka la pynsngew sha u paidbah mynta ka la don ïa u briew u ban mihkhmat sha Delhi u ban rah ïa ki mat khamtam kum ka mat bamsap namar hapoh ka jylla Meghalaya ym ju don satia kum ka Enforcement Directorate (ED) bad ka CBI ki ban jurip ne tohkit ïa ki kam bamsap bad kane ka treikam tang sha kiwei pat ki jylla.
“Kine ki mat kiba ngi la kren kim dei ban kut tang hapoh ka jylla jong ngi hynrei ngi la don mynta ïa u briew jong ngi u ban leit hapoh Delhi u ban rah ïa ki mat”, la bynrap u Bah Ardent.
Halor kane ka mat bamsap, na ka liang ka VPP kan sa ïakren bad ka Sorkar India kumno ban ïakhun ïa ka bamsap bad ka jinglong-jingman hapoh ka jylla Meghalaya.
