Shillong, Jylliew 04
Wat la ka jingñiew ‘vote’ ym pat tip ïa ka kylla kaba nyngkong, hynrei ki nongkyrshan ka VPP na Pynursla kiba la poi naduh 9 baje mynstep hakhmat ka khyrdop jong ka JN Complex Stadium ban wan die ïa u prah rit ha ka dor 150 tyngka uwei.
Kine ki nongkyrshan kiba la wan die ïa ki prah ki la wan kit da ka byrni kiba don palat 200 tylli bad la ïohi ki nongkyrshan kiba la wan ban ñiew ‘vote’ ki la ïaknieh ban thied ïa u prah.
Nalor nangta, la don ki kynthei kiba wan die ïa ki sopti kiba la dro ïa ka shap jong u prah bad ka lama kaba la don haduh lai haduh saw kynhun kiba la wan shong ban die.
Kine ki nongkyrshan kiba la wan die ïa ki sopti bad ki lama prah ki la pynpaw ba ki la don jingkyrmen ban jop bad na kata ka daw ki la shna lypa ban wan die mynta ka sngi.
Ïa ka sopti ki die 300 tyngka, ïa ka lama kaba rit ki la die 100 tyngka bad haduh ban da kut ka jingñiew ‘vote’ ki la dep die lut.
Katba uwei pat nongdie ice-cream na Mawhati u la wan die hakhmat jaka ñiew ‘vote’ ryngkat ka tem da ka jingrwai prah.
Namar ka jingsngewkmen ba la tam u kyrtong ka VPP ha ka jingñiew ‘vote’, une u samla u la shad da ka jingkmen ban tem ïa ka jingrwai prah kat haduh ba um kynmaw shuh ban die ice-cream sha ki paidbah.
Kaba kham pynshongshit shuh shuh ha kane ka sngi ñiew ‘vote’ ka dei hadien ba la dep pynbna ïa ka jingjop ha kaba iwei meiieid i la wan poi sha Polo ban shad da ka jingkmen ryngkat ki samla kynthei bad shynrang.
