Shillong, Jylliew 04
Ka Voice of the People’s Party (VPP) ka la ïoh ïa ka jingjop ha 32 tylli ki constituency napdeng ki 36 tylli ha Rilum Khasi-Jaiñtia bad kane ka la paw hadien ba la dep ban ñiew ïa ki vote ha ka Sngi Ba-ar.
Ha kane ka sngi ñiew vote, u kyrtong ka VPP, Dr Ricky AJ Syngkon, u la jop kput ïa u kyrtong ka Congress u Bah Vincent H Pala da 3.70 lak tam ki vote, ha kaba u Dr Ricky u la ïoh haduh 571078 vote katba u Bah Pala u la ïoh tang 199168 vote bad ka Kong Ampareen Lyngdoh kyrtong ka NPP ka la ïoh 186488 vote.
Haba phai sha 36 tylli ki constituency jong ka Rilum Khasi-Jaiñtia bad wat la ka VPP ka la jop tang ha ki 4 tylli ki constituency ha ka ilekshon MLA kaba la dep, hynrei ka la pynkyndit pat ïa kiwei ki seng saiñ pyrthei haba ka la tam bad ïoh jingjop ha 32 tylli ki constituency ha kane ka ilekshon MP kaba dang shu dep.
Tang ha ki saw tylli ki constituency ba ka VPP ka la ïoh duna vote na kiwei ki kyrtong bad kine ki kynthup ha East Shillong ka Constituency ba la mihkhmat hi da ka Kong Ampareen Lyngdoh kum ka MLA, ha kaba ka NPP ka la ïoh 6027 vote, ka VPP ka la ïoh 5141 vote bad ka Congress ka la ïoh 3303 vote.
Ha South Shillong ba la mihkhmat da u MLA ka BJP u Bah Sanbor, ka NPP ka la ïoh 7701 vote, ka VPP 5201 vote bad ka Congress ka la ïoh 4205 vote. Ha Nongpoh Constituency ruh la tam da ka Congress kaba la ïoh 11988 vote, ka VPP ka la ïoh 10480 vote bad ka NPP ka la ïoh 4555 vote bad ha Jirang Constituency ha kaba ka Congress ka la ïoh 11050 vote, ka NPP ka la ïoh 9545 vote bad ka VPP ka la ïoh 8139 vote.
Lait na kine saw tylli ki constituency, ha kiwei pat 32 tylli ki constituency ka VPP ka la jop bad tam bun bad wat ha ki constituency jong ar ngut ki Symbud Myntri Rangbah ka jylla kata ha Pynursla Constituency ba la mihkhmat da u Bah Prestone Tynsong bad ha Nartiang ba la mihkhmat da u Bah Sniawbhalang Dhar.
