Tura, Jylliew 04
U kyrtong ka Indian National Congress’ (INC), u Saleng Sangma u la jop kput na Tura Parliamentary konstitwensi, bad kane ka jingjop ka long ruh ka sien kaba nyngkong eh ka ban sah khana ha kaba u la lah ban knieh noh ïa ka jingjop na ka jaka kaba u P.A. Sangma (Bam Kwai ha Dwar U Blei) bad ki bahaïing jong u ki la bat mynta la bun phew snem.
Wat la kane ka long ka jingjop kaba la pynkyndit ïa baroh, hynrei ki don katto-katne kiba la khmih lynti ïa kaei ka ban sa jia.
U Saleng u la pynrem noh ïa ka MP kaba la jop la lai sien kynthih na Tura, ka Agatha Sangma da 1,55,241 ‘vote’ katba u kyrtong ka AITC, u Zenith Sangma u la wan ba-lai. U kyrtong shimet, u Labenn Marak u la ïoh 6,910 ‘vote’.
Ka jingñiew ‘vote’ ka la sdang ha ka por 8 baje mynstep ha ka Sngi Ba-ar hapdeng ka jingpyrkhing ki bor pahara. Na ki 4 ngut ki kyrtong kiba la ïa aireng, tang u Saleng uba la wan poi sha ka jaka ñiew ‘vote’ dang step phyrngab – ka jingpyni dak ba ki kaiphod ba napoh jong ki seng ki la dep tip lypa mano ba tam.
U Saleng u don ka jingkyrmen skhem na kaba sdang bad hadien ba la ïoh pdiang ïa ka syrnot jingjop na u Returning Officer (RO), u la ai nam ïa ka jingjop jong u sha ki kam jong ka seng bad ki jingkyrkhu jong U Blei.
Hadien ka jingjop, u Saleng u la ong ba ki don bun bah ki mat ki jura kiba hap ban pynsngew na bynta ka Ri-lum Garo bad un sa shong bad ki nongkyrshan lem bad ki nongïalam ka seng ban kren halor kiei ki mat kiba donkam ban rah ha kaba sdang.
“Kane ka jingjop ka long kaba phylla ïa ngi. Kane ka jingjop ka tam ïa kaei kaba ngi la kheiñ bad baroh kane ka dei ka mon jong u paidbah badU Blei,” la ong u Saleng.
“Ka pule-puthi bad ka kyrduh kam nalor kiwei ki donkam ïa ka jingpynleit jingmut bad ngi donkam ban pyrkhat kaei kaba ngi hap ban rah shuwa,” la ong u Saleng.
U la bynrap ba ka jingjop ka dei ka mon jong u paidbah naba ki kwah jingkylla bad un trei ban pynurlong ïa ki jingkwah jong ki paidbah bad ka mon jong U Blei. Kane ka dei ka jingjop na bynta u paidbah.
Ïa ka Tura Parliamentary konstitwensi la bat da u P.A. Sangma (Bam Kwai ha Dwar U Blei) bad ki bahaïing hasem jong u naduh u snem 1977 bad ym shym la don mano-mano kiba la kot ban knieh noh ïa kane ka konstitwensi na ki.
Ka jingjop u Saleng ka wan ba-ar hadien ka jingjop kput u Conrad ha ka por ba khlad noh u kpa jong u, PA Sangma (Bam Kwai ha Dwar u Blei) ha u 2016.
