Nongstoiñ, Jylliew 04
Haduh lai tylli ki ïing ha ka shnong Mawthir ha West Khasi Hills ki la julor hadien ka jingbom maw kulmar jong ka kompeni shna surok ka Spica Company kaba pyntrei ïa ka surok Nongstoiñ-Rambrai.
Halor kane ka bynta, ka FKJGP Rambrai Circle hapoh ka jingïalam u samla Skalanboksis Paliar, Education Secretary ha ryngkat dkhot na ka Circle bad na Mawthir Unit, ki la lap ba ka jingbym suitñiew ki nongtrei ka kompeni shna surok ‘highway’ ka Spica Company ban pynbthei kulmar ïa u bom thang maw ka la pynjulor ïa 3 tylli ki ïing ha ka shnong Mawthir katba ar ngut ki heprit ki la mynsaw.
Nalor nangta, ki la ong ba ka seng ka pynrem jur bad dawa ba katei ka kompeni ka hap ban siew bai lutksan bad pynshna thymmai ïa kitei ki ïing kiba la julor bad ka seng shen kan sa leit ban ujor sha ki bor ba halor pyrshah ïa katei ka kompeni.
Ki dkhot ka FKJGP ki la ong ruh ba kane ka jingleh ka wanrah shisha ïa ka jingshong syier ïa ki paidbah kaba lah ban ktah wat ïa ki mynsiem briew ruh.
Shuh shuh la ong ruh ba ka seng kan ym shong kli-kti bad lada kane ka kompeni ka sngap mynthi bad kam ïarap mardor, ka seng kan sa leh ïa kaba donkam wat ban pynsangeh shwa ïa ka jingtrei ruh namar kham kordor ka mynsiem briew ban ïa kiei-kiei.
