Tura, Jylliew 04
Ka jingñiew ‘vote’ na bynta ka Tura Parliamentary konstitwensi ka la poi sha ka kaba kut bad ka INC ka la jop kput ha kane ka ilekshon. Kane ka jingjop ka la wan jia hadien jong shibun kiei-kiei bad ka jingkhie im biang jong ka Congress la ka long ha ka ri bad ha ka Jylla kumjuh.
Na ki 24 tylli ki konstitwensi ha Ri-lum Garo, u Saleng u la jop ha 23 tylli ki konstitwensi katba ka Ampati ka la leit sha ka NPP. Ki 2 tylli ki konstitnwensi ha Tura (North bad South Tura) la jop da ka INC – ka jingktah kaba jur naba ïa kine ki 2 konstitwensi la mihkhmat da u Myntri Rangbah ka Jylla, u Conrad Sangma (South) bad Lamphang ka ïingdorbar thawaiñ, u Thomas Sangma.
U Saleng (3,83,919) u la jop ïa ka Tura Parliamentary konstitwensi da 1,55,241 ‘vote’ pyrshah ïa ka Agatha (2,28,678) katba u kyrtong ka AITC, u Zenith Sangma u la wan ha ka kyrdan ba-lai bad ïoh tang 48,709 ‘vote’.
Ka sien bakhatduh kaba ïasyriem kum kane ka la jia hadien ka jingkhlad noh u P.A. Sangma (Bam Kwai ha Dwar U Blei), bad lyngba ka ‘vote’ isynei, u Conrad Sangma u la sar bad jop kput ha ka khana ka ban sah kynmaw ha Ri-lum Garo.
Kaei kaba kham itynnad ka long ba ka Ri-lum Garo ka don 18 ngut ki MLA – NPP kiba dang shu jop shen ïa ka ilekshon sha ka ïingdorbar thawaiñ ha u 2023. Da kaba khmih ïa ki jingkheiñ jong u 2023, ka TMC ka la dei ban dei ma ka kaba hadien ban ïoh ïa ka jingjop, hynrei ha kane ka 1 snem ba la dep, ka la don ka jingkylla bad ha ka jaka ka TMC, la sakhi ba ka Congress ka long kata ka seng kaba kham biang kaba ki paidbah ki kham phaikhmat.
Kumta ka buh ïa ka jingkylli – kumno ka NPP ka leit rem naba kam pat ju phohsniew hi ruh ba kan rem?
Ha kaba sdang, ka jingpynbna ka BJP ban kyrshan ïa ka NPP, ban ym pynïeng kyrtong hapoh Meghalaya, ha kiba bun ki liang, ka dei ka jingsdang jong kiba bun ki jingeh na bynta ka Agatha. Kane ka la plie lad ïa ka Congress bad ka TMC. Wat la ka TMC kam shym la lah ban leh eiei, u Saleng bad ka INC ki la ïoh lad bad shim kabu halor kaei kaba la jia.
Ka BJP kam pat shym ïoh ban bsuh khlieh hapoh ka Jylla bad kane ka la bteng bad ka ilekshon MP naba ki nongthep ‘vote’ ki bym shaniah (ha ka liang ka niam) kim shym la kwah shuh ïa ka BJP ban wan rung shapoh ka Jylla.
Kumjuh, ka jingbym pynbna kyrtong ka BJP ha ki 2 tylli ki konstitwensi bad ban ai jingkyrshan pat ïa ka NPP ka la nang ktah shuh-shuh ïa ka NPP naba kiba bun ki nongtrei bad nongkyrshan ka BJP ki sngew ba kane ka sienjam kaba la shim ka long pyrshah ïa ka kam kaba ki la pyntyllun na bynta ka seng. Naba ka NPP hapoh ka thaiñ ruh kam shym la shaniah ïa ka BJP, ka la kylla long pynban ka jingap ba lano kawei ka bynta kan dkut noh.
Ka jingïakhih paidbah: Kiba bun kiei-kiei ki la synñiang sha kaei kaba la ñiew mynta kum ka jingïakhih paidbah na bynta ka jingkylla. Kine kiei-kiei kiba la kdew haneng ki long ki bynta ba hakhmat eh jong kane ka jinglong-jingman.
Kumba long lem ka jingjop kput jong ka VPP ha Ri-lum Khasi-Jaiñtia, ha Ri-lum Garo ruh, ka jingpyrkhat ban pynkylla noh ïa ka MP ka la don khamtam haba ïadei bad ka jingkren shane-shatai ba ka Agatha kam shym da leh eiei than eh ïa ka thaiñ. Kane ka la ïalam ban pynpyrkhat ïa ki paidbah ba mano ban long uba biang eh ban bujli bad u Saleng sa shisien u la long uba hakhmat eh.
