Shillong, Jylliew 04
U President ka Voice of the People Party (VPP), Bah Ardent M Basaïawmoit, u la kyntu ïa ki nongïalam ha ka Sorkar Meghalaya Democratic Alliance (MDA) ba ïalam da ka National People’s Party (NPP) ba kin hiar shuki noh na ka Sorkar hadien ka jingshah rem kput ha ka ilekshon Lok Sabha na Shillong bad Tura.
“Hooid, ka dei ka jingkylli kaba ïahap. Lada ki nongïalam ka MDA ki dang don ka burom, ki dei ban shim ïa ka jingkitkhlieh bad hiar shuki noh na ka Sorkar,” la ong u Bah Ardent haba ïakren bad ki lad pathai khubor.
U Dr Ricky AJ Syngkon, kyrtong ka VPP u la thaw khana pateng da kaba pynliem kput ïa u kyrtong ka Congress Bah Vincent H Pala uba la long MP haduh 15 snem kynthih da palat 3.7 lak ‘vote’. Haba phai pat sha rilum Garo, u kyrtong ka Congress u Saleng A Sangma u la pynliem ïa ka Agatha K Sangma, kaba dei ka para jong u Myntri Rangbah ka Jylla da palat 1.55 lak ‘vote’ bad ruh ban ïoh mihkhmat syndon hadien bun phew snem da u briew ba nabar ka ïing u (L) Purno A Sangma.
U Bah Ardent u la shim ruh ba kane ka jingjop kput jong ka seng ka long kum ka rai kaba shai kdar ba ki paidbah ka Jylla ki la duh ïa ka jingshaniah bad jingngeit ha ka Sorkar MDA.
“Ha kane ka por nga kwah ban ai khublei ïa U Blei. Kane ka dei ka dak ba U Blei u la pynpaw haba ngi shaniah pura ha u, bad kum ka seng ngi da sngewkmen ïa kane ka jingkyrshan ba radbah, ka jingshaniah ba ki paidbah ki la ai ha ngi,” u la ong.
Ha kawei pat ka liang, u Bah Ardent u la ong, bad kam ba kane ka risol kaba mynta ka sngi ka la kren jam halor ka jingshisha ba ka VPP kan sa mih bujli ha ka jaka jong baroh ki seng riewlum ha Meghalaya.
“Kumba nga ong, ngi la ïakhun pyrshah ïa baroh ki seng saiñ pyrthei kiba don ha ka liang synshar namar ka jingmih jong ka VPP ruh ka dei halor ka nongrim ka jingbym lah shakri jong baroh ki seng saiñ pyrthei kynthup ki seng riewlum bad ngi ju kren bunsien ba shisien ka sngi, ka VPP kan sa bujli ïa baroh ki seng riewlum, ïa kaba ngi la leh mynta lyngba ka risol ba phi la ïohi,” u la ong.
Haba ïaroh ïa ka jingstad u paidbah, u Bah Ardent u la ong ba ka risol jong kane ka ilekshon ka dei ka dak ba ym don mano-mano ruh ba lah ban shu ïalehkai ïa u paidbah.
