Shillong, Jylliew 04
U Secretary ka Meghalaya Pradesh Congress Committee (MPCC), Bah Manuel Badwar ha ka Sngi Ba-ar u la ong ba ka daw kaba la pynlong ïa ki paidbah ban phaikhmat sha ka Voice of the People Party (VPP) ka dei namarba ki la sngew kutlad halor ki jinglong-jingman hapoh ka Jylla.
“Katkum ka jingpeit jong nga, kata ka jingshongshit ka treikam bha hangne…ym dei pat ban ong ka jingshongshit khleh biej, hynrei ki briew ki da sngewthuh bad lehse ki kwah hi da kaei-kaei kaba kham pher,” u la ong.
Ha kajuh ka por, u la ong ba ki paidbah ki la thait ban peit ïa ka jinglong-jingman kaba mynta hapoh ka Jylla – kaba la nang hiar ha kiba bun ki liang kum ha ka imlang-sahlang bad kiwei-kiwei.
“Ka jingsngew kutlad ha ki paidbah, ki peit ha ka liang ka pule-puthi ruh ka nang hiar, ka koit ka khiah ruh ka hiar, te ka jingsngew kutlad ka don. Ha kano ka rukom pat ki leit ban pyni ne pynpaw ïa kane ka jingsngew kutlad jong ki, lehse ki ïohi ïa ka VPP kum ka seng kaba lah ban pynpher bak-ly-bak ïa ka rukom treikam namarba ki mat ki phang jong ka VPP ruh ki kren kumta,” la ong u Bah Badwar.
Ha kawei ka liang, u la ong ba wat la ha ka kyrdan jong ka ri, ka VPP kam da don ïa ka mat ka phang, hynrei haba phai pat sha ka Jylla, ka seng ka la kren shai ban wanrah ïa ka saiñ pyrthei kaba khuid ba suba nalor kiwei-kiwei.
“Mynta, shisien ba u paidbah u la buh jingkyrmen ha ki, kan hap long lang kumta hi. Ka shong ha u paidbah ruh naba u ai jingkyrmen, kumta te kan bha hi,” u la ong.
Shuh shuh u la bynrap, “Ka jinglong-jingman jong ka jingïathep ‘vote’ ki briew – u Khasi jong ngi te u long kumta, shisien ba u la noh shawei, u da noh thep mynsiem, itynnad kata ruh. Tangba shu long ha kano ka rukom pat kan ïaid shakhmat, ngin sa peit ïa kane.”
