Jowai, Jylliew 04
Ka jingïap jong ki briew ba bam ïa u tit khlaw ka la kiew sha ka 5 ngut hadien ka jingkhlad noh jong uwei u rangbah ha ka step 4 tarik Jylliew.
Une u rangbah ba la khlad la tip kyrteng kum u Ma Obar Sutnga, 70 snem. U la khlad hapoh ka jingshah sumar ha North Eastern Indira Gandhi Regional Institute of Health and Medical Science (NEIGRIHMS), Shillong.
Nalor u Ma Obar Sutnga, kiwei de kiba la khlad ki long ka kurim jong u, ka Kong Anna Suchiang kaba la khlad ha kajuh ka hospital ha ka step 2 tarik Jylliew lem bad lai ngut ki khynnah rit, ka Riwansaka Suchiang 8 snem, Kitlang Suchiang 12 snem bad u Wansalan Suchiang 15 snem kiba dei ki khun jong ka Kong Jumonlang Suchiang bad Ma Linus Sumer.
Kiba dang don mynta hapdeng ka jingshah sumar ki long ka Kong Jumonlang Suchiang lem bad u khun ba dang 11 bnai kumjuh u Ribaitki Shadap uba don mynta hapdeng ka jingshitom jur hapoh Nazareth Hospital, Shillong.
U Nidawan Kanai, 12 snem ruh u don hapdeng ka jingsumar hapoh NEIGRIHMS, Shillong.
Kum ban shu pynkynmaw kane ka jingbam tit khlaw ka la jia ha ka 28 tarik Jymmang ha ka shnong Saphai kaba hap hapoh Laskeiñ C&RD Block, West Jaiñtia Hills District.
