Tura, Jylliew 04
Ka kyrtong jong ka National People’s Party (NPP) na Tura, ka Agatha K Sangma, ha ka Sngi Ba-Ar ka la ai khublei kitbok ïa u kyrtong ka seng Congress, u Saleng A Sangma, uba la jop pyrshah ïa ka ha ka ilekshon MP Lok Sabha mynta u snem.
Ha ka jingñiew ‘vote’ kaba la pynlong mynta ka sngi, ka Agatha ka la shah rem noh ha u Saleng hadien ba ka la shah jied kum ka MP la lai sien na Tura. U Saleng u la ïoh haduh 3,83,919 ‘vote’ bad u la jop ha ki 23 na ki 24 tylli ki konstitwensi MLA na Rilum Garo. Ha kawei pat ka liang, ka Agatha, kaba la jop ïa ka ilekshon MP ha u snem 2019, ka la ïoh 2,28,678 ‘vote’ bad ka la shah rem da haduh 1,55,241 ‘vote’.
Ha ka jingthoh ba ka la buh ha sla ‘Facebook’, ka Agatha ka la ong, “Ka la long ka burom ban shakri ïa ki paidbah ka Rilum Garo kum ka MP ka jong ki, bad nga sngewnguh ïa ka kabu ba la ai ha nga. Wat la nga khlem jop ha kane ka ilekshon, ngan bteng ban shakri ïa ki paidbah ka Rilum Garo bad Meghalaya ha kano-kano ka rukom kaba nga lah.”
Ha kajuh ka por, ka la ai khublei ïa ka seng NPP bad ïa baroh kiba la kyrshan ïa ka. Nalorkata, ka la ai khublei ïa u Saleng bad ka kyrmen ba un ïalam bha ïa ki paidbah.
