Shillong, Jylliew 04
U kyrtong ka Voice of the People Party (VPP), Dr Ricky AJ Syngkon, u la long u nongjop na Shillong parliamentary konstitwensi da kaba jop kput ïa u MP uba dei u kyrtong ka Congress, u Bah Vincent H Pala, katba u kyrtong ka Congress u Saleng A Sangma u la long u nongjop na Tura parliamentary konstitwensi da kaba pynliem ïa ka MP kaba dei ka kyrtong ka National People’s Party (NPP) ka Agatha K Sangma hadien ka jingñiew ‘vote’ kaba long ha baroh ar tylli ki konstitwensi ha ka Sngi Ba-ar.
Hadien ba la dep ñiew ‘vote’ la pynbna ïa u Dr Ricky AJ Syngkon kum u nongjop na Shillong uba la ïoh 5, 71,078 ‘vote’ bad tam da 3,71,910 ‘vote’ ïa u kyrtong ka Congress u Bah Vincent H Pala uba wan ba-ar bad ïoh 1,99,168 ‘vote’.
Ka NPP kaba don ha ka bor synshar kam shym la lah ban jop ha kaba ka kyrtong jong ka kaba dei ruh ka Myntri Sorkar ka Dr Mazel Ampareen Lyndgoh ka la wan balai bad ïoh 1,86,488 ‘vote’. U kyrtong ka United Democratic Party (UDP) uba la kyrshan lang da ka Hill State People’s Democratic Party (HSPDP) hapoh ka kynhun Regional Democratic Alliance (RDA) u Bah Robertjune Kharjahrin u la wan basaw ha kaba u la ïoh 44,563 ‘vote’.
U Prof Lakhon Kma kum u kyrtong shimet, u la ïoh 18,582 ‘vote’. U Bah Peter Shallam ruh kum u kyrtong shimet u la ïoh 7,024 ‘vote’s, tangba ki ‘vote’ ha u budam None of the Above (NOTA) ki don haduh 11,008 ‘vote’ kham bun ban ïa ki ‘vote’ kiba ïoh u Bah Peter. Ki don ruh 646 tylli ki ‘vote’ kiba la shah kyntait.
Ha Tura parliamentary konstitwensi, u kyrtong ka Congress, u Saleng A Sangma u la ïoh 3,83,919 ‘vote’ ha kaba u la tam da 1,55,241 ‘vote’ ïa ka kyrtong ka NPP ka Agatha K Sangma kaba wan ba-ar bad ïoh 2,28,678 ‘vote’. U kyrtong ka TMC u Zenith Sangma u la wan balai bad ïoh tang 48,709 ‘vote’. U kyrtong shimet u Labenn Ch Marak u ïoh 6,910 ‘vote’.
Ki ‘vote’ kiba shon ha u budam None of the Above (NOTA) ki don 5,840 ‘vote’, katba ki ‘vote’ kiba shah kyntait ki long 603 ‘vote’.
Ïa ka syrnot ban pynskhem ïa ka jingshahjied jong kine ar ngut ki MP bathymmai na Shillong bad Tura parliamentary konstitwensi la aiti da ki Returning Officer hadien ba la dep lut ki kam kiba ïadei bad ka jingñiew ‘vote’.
