Shillong, Jylliew 04
Ka Myntri Sorkar Jylla bad kyrtong ka National People’s Party (NPP) kaba la shah rem noh ha kane ka ilekshon MP, ka Dr. M. Ampareen Lyngdoh ha ka Sngi Ba-ar ka la ong ba ki nongïalam ka seng kin hap ban shong pyrkhat sani bha shi snem kynthih ban wad ïa ka daw halor ka jingdom jong ki paidbah.
“Lada phi kylli ïa nga ïa ki daw, nga shimet nga ïohi ba ka don ka pali ïa kiei-kiei baroh bad kane ka pali ka don pat sa ka jingbud jong kata ka jingrai ha kum ka ilekshon,” la ong ka Dr. Lyngdoh haba kren sha ki lad pathai khubor.
Ha kajuh ka por, ka la kitbok kitrwiang ïa ka VPP bad ki nongïalam jong ka kumjuh ïa ki paidbah kiba la jied ïa ka seng (VPP).
“Ngi na ka liang ka MDA, ngi dang don hadien ba u paidbah u la ai ka rai ha ka ilekshon MLA bad ngin ïaid shakhmat bad pyrshang ban pynbeit ïa kita ki jingbakla. Tip hangno ngi bakla, ngi kum ka seng ngin hap wad,” ka la ong.
Ka la ong ruh ba kane ka jinglong-jingman jong ka ilekshon kam dei tang ha ka Jylla hynrei la sakhi ïa ka ha kylleng sawdong ka ri India ha kaba ka risol ka la pynkulmar ïa ki paidbah.
“Lehse ngi kum ka seng kaba ïalam ïa kane ka Sorkar, ngi dei ban wad kaei ka jingduna, balei ki paidbah ki jubab kumne bad ngin pyrshang katba lah ban sharai ïa ki,” la ong ka Dr. Lyngdoh kaba la pynsngew ba ka la dep ïohi lypa ïa kaei ka ban sa jia bad kam kyndit shuh namarba ka pali ka long ha kane ka rukom.
“Ngin pyrshang ban pynbeit ïa kata ka jingdom jong ki paidbah ïa ngi, ngin hap wad, ka dei ban don ka daw bad ngin wad ïa kata ka daw. Kajuh ka jingai rai u paidbah u ai sha Ri-lum Garo, kajuh ha Ri-lum Khasi, tang 2 konstitwensi ngi don, ngi la duh ïa kita ki jingïadei kiba ngi nang pyrkhat kin dang don,” ka la ong.
Haba kdew ba ka risol ha kane ka kynti ka dei kaei-kaei ka ban hap shong pyrkhat bha, katei ka nongïalam ka la ong ba kane kam dei shuh ka jingshah ktah tang ïa ka NPP shimet, hynrei ïa baroh ki seng saiñ pyrthei bad na kata ka daw ka la pyndonkam ïa ka kyntien ‘jingdom’.
“Ki dom ïa kaei ki paidbah, ngi kum ki nongïalam te ngi hap ban shong shi snem kynthih ban wad balei kine ki paidbah ki dom,” ka la ong.
Shuh shuh haba bynrap ba kam long kaba suk ban ïakhun ilekshon, ka Myntri ka la ong ba haba phai sha 1-Shillong Parliamentary konstitwensi ka seng ka don tang 8 ngut ki MLA bad lada ha 7 konstitwensi kam lah ban jop, ka la dei kaei-kaei ka ban hap shong pyrkhat bha.
Ha kawei ka liang, ka la ai khublei ïa baroh kiba la ai ka jingkyrshan ïa ka kumjuh ïa ka seng lyngba ki shi lak tam ki ‘vote’ jong ki.
