Shillong, Jylliew 04
Ka Voice of the People Party (VPP) kaba la ïoh jingjop ha kane ka ilekshon MP kam pat shim satia ïa ka rai ïano kan leit ban ai jingkyrshan la kan dei ïa ka kynhun synrop National Democratic Alliance (NDA) ba ïalam da ka BJP ne ïa ka INDIA Bloc.
Haba ïakren bad ki lad pathai khubor hadien ka jingjop u kyrtong jong ka VPP na Shillong, u Bah Ardent u la ong, “Kum ki nongïalam seng, ngin sa ïa shong pyrkhat bad ban sa shim ïa ka rai halor kane ka kam”.
Haba pynpaw ba ka VPP kan sa rah ïa ki mat ba ïadei bad ka kam bamsap ha Delhi, u Bah Ardent u la ong, “Ngin sa buh jingkylli ïa ka Sorkar India, balei ba kam phah ïa ka Enforcement Directorate (ED) bad ka Central Bureau of Investigation (CBI) sha Meghalaya haba don bun ki jingkynnoh bamsap hapoh ka Jylla”.
Nalor ka kam bamsap, u la ong ba ka jingïakhun jong ka VPP kan long ruh pyrshah ïa ka jingduk bad ka jingleh shiliang khmat.
Nalor kane, u Bah Ardent u la kular ruh ba ka VPP kan buddien khlem shongthait bad ka Sorkar India halor ki mat ba ka la buh ha ka mat ïalap ilekshon. U la ong, “Ka ILP kan dei kawei ka mat kaba la kynthup ha ka mat ïalap ilekshon jong ka VPP, ka article 371 ruh ka dei kawei bad bun kiwei kiwei. Ka seng kan buddien khlem shongthait ïa kine ki mat, kiba la kdew ha ki mat ïalap ilekshon bad ka Sorkar India.”
