Shillong, Jylliew 04
Ka jingñiew vote ha 543 tylli ki Lok Sabha konstitwensi ha ka ri baroh kawei ha ka Sngi Ba-ar ka la long ka jingjop kaba pyndiaw ïa ka BJP bad ki paralok hapoh ka kynhun National Democratic Alliance (NDA), bad ha kajuh ka por ka dei ka jingrem salit jong ka Congress bad ki paralok jong ka hapoh ka kynhun Indian National Developmental Inclusive Alliance (I.N.D.I.A).
Tad haduh 01:00 baje shiteng synñia, ka Election Commission of India (ECI) ka pyni ba ka BJP ka la ïoh 240 ngut ki MP.
Ki paralok ka BJP kiba kynthup ïa ka Telugu Desam Party (TDP) na Andhra Pradesh ka la jop 16 ngut ki MP bad ka Janata Dal (United) na Bihar ka la ïoh 12 ngut ki MP.
Ban thaw Sorkar tang da marwei hi ka seng saiñ pyrthei ne ka kynhun synrop, donkam ban ïoh 272 ngut ki MP.
Ka Congress marwei ka la kham lah ban leh bha ha kaba ka la jop 99 ngut ki MP, bad ki paralok jong ka hapoh ka kynhun I.N.D.I.A ruh ki la lah ban kham leh bha ha kaba ka Samajwadi Party (SP) ha Andhra Pradesh ka la jop 37 ngut ki MP, ka All India Trinamool Congress ha West Bengal ka la jop 29 ngut ki MP bad ka Davida Munnetra Kazhagam (DMK) ha Tamil Nadu ka la jop 22 ngut ki MP. Kiwei pat ki paralok ka Congress kum ka Shiv Sena (Uddhav Balasaheb Thackrey) ka la jop 9 ngut ki MP nalor ka NCP (Sharadchnadra Pawar) ka la jop 7 ngut ki MP. Ka RJD ka la jop 4 ngut ki MP bad ka Aam Admi Party (AAP) ka la jop 3 ngut ki MP nalor kiwei pat ki seng saiñ pyrthei kiba rit kiba jop tang mar ar ne mar iwei. Ki kyrtong shimet ruh ki la jop 7 ngut haduh mynta.
Lada ka TDP bad ka JD(U) ki kylla rongser bad lada ki pyneh ban leit lang bad ka kynhun NDA, kane kan buh jingeh ïa ka BJP ban pynurlong ïa ka jingangnud ban thaw Sorkar biang ha ka sien kaba lai na ka bynta ka samoi treikam 2024 haduh 2029.
Tad haduh ba thoh ïa kane ka khubor, ki dang don ki konstitwensi kiba ka jingñiew vote kam pat dep lut, bad dang sahteng ban pynbna ïa ki kyrtong kiba long ki nongjop.
U Myntri Rangbahduh u Narendra Modi u la ong ba ka BJP lem bad ka kynhun NDA kan sa thaw ïa ka Sorkar kaba thymmai ha ka sien balai bad u la kam ba kane ka dei ka sien banyngkong hadien u snem 1962 ba ka Sorkar kan wanphai biang na ka bynta ka samoi treikam ka balai. Kane ka jingjop ka BJP ha kane ka ilekshon ka kham duna bad long khongpong bad kaei kaba la dep ïathuh lypa da kiba bun ki nongpeit pyrman bad lad pathai khubor kiba la ai jingkheiñ antad ba ka BJP bad ka kynhun NDA kin sa jop ha kaba kin ïoh hapdeng 370 haduh 400 ngut ki MP.
Ha kawei pat ka liang, ka kynhun I.N.D.I.A kan sa ïakynduh lang ha Delhi ha ka Sngi Balang na ka bynta ban ïatai sani kumno ka kynhun kan leh khamtam ban thaw ki lad ki lynti ban ïoh thaw Sorkar.
Ka don ka khubor kaba ong ba ka kynhun I.N.D.I.A ka lah ruh ban ïakren bad ki nongïalam ka TDP bad JD (U) na ka bynta ban wan lang ban thaw ïa ka Sorkar synrop kaba thymmai.
