Nongpoh, Jylliew 05
Ka jingbym biang jong ki nala pyntuid um ha ka shong Jorpul kaba don marjan bad ka University of Science & Technology Meghalaya (USTM), ka la wanrah ïa ka jingsyrtok kaba khraw ïa ki paidbah nongshong shnong na ka jingshlei jong ka um hadien ka jingther jong u ‘lapbah uba la neh baroh shi miet ha ka miet Sngi Ba-ar.
Lyngba ki jingringdur, la ïohi ba ka umktieh kaba la shlei, ka la ïoh ban rung wat shaduh ki ïing ki sem, ki dukan ha ka step kaba bud kaba la wanrah ruh ïa ka jingduh jong ki mar ki mata bad khamtam lei ka surok ha Jorabat ka la kylla kum ka wah shipor na ka jingshlei bad dap um.
Kitei ki nongshong shnong kiba mad ïa katei ka jingeh, ki la ïathuh ba kane kam dei satia ka sien kaba nyngkong, hynrei kaba ju jia na ka por sha ka por khamtam ha ki por ba jur slap man la u snem. Ki la ïathuh ruh ba ka daw jong katei ka jingshlei um, ka dei ka jingsahkut jaboh bad ka jingbym biang satia jong ki nala pyntuid um.
Shuh shuh, ki nongshong shnong ka Jorpul ki la ong ruh ba kane ka jingshlei um, ym tang ba ka rung sha ki ïing ki sem bad ki dukan ki jong ki bad pynduh ïa ki mar ki mata, hynrei ka pynlong ruh ïa ka jingsniew kloi jong ka surok na ka jingshah rong ha ka um.
Katei ka jingther jong u ‘lapbah ha kitei ki thaiñ, ka la wanrah ruh ïa ka jingshlei um kaba jur ha ki bynta jong ki surok ka Jorabat ha khrum ka jingkieng ‘over-bridge’ kaba pynïasoh ïa ka nongbah Guwahati, Shillong bad Sonapur, ha kaba la ïohi ba bun tylli ki kali ki la shah taplut ha ka um. Kane ka jingshlei um ha katei ka jaka naduh mynstep jan haduh ka shiteng sngi, ka la wanrah ruh ka jingthut ha ka leit ka wan jong ki paidbah.
