Nongpoh, Jylliew 05
Ha kawei ka jingjia ha ka step phyrngab jong ka Sngi Balang, kawei ka ïing kaba don ha ka shnong Pahamrioh Them, Ri Bhoi District ka la ingkhong lut khait bad duh lut ïa baroh ki jingdon jingem na ka jingbam shngiam jong ki thylliej ding.
Kane ka jingkem ding jong katei ka ïing kaba dei trai da ka Kong Isila Kshiar ka la jia ha ka por kumba 3 baje eiei. La ïathuh ba ha ka por jong katei ka jingjia, uwei u khun rit jong katei ka longkmie uba don jingduna ha ka bor pyrkhat pyrdaiñ, u dang ïoh thiah lyngngai, hynrei lyngba ka jingïohi kloi jong ki paramarjan, kiba la ïamih mar-mar ban leit kyrsiew bad rah noh ïa u shabar jong ka ïing, utei u herprit u la lait noh na ka jingjia kaba sngewsih.
Na ka liang ka Kong Isila Kshiar ka la ïathuh ba kam tip satia na kaei ka daw kaba la pynlong ïa ka ïing jong ka ban kem ding namar kam don satia ha ïing ha katei ka por ba jia ba ka leit sah bylla ïing briew ha shnong Umling, bad pyntip ruh ba ha katei ka ïing, la sah tang utei u khun jong ka uba don jingduna ha ka bor pyrkhat pyrdaiñ.
Shuh shuh ka la ïathuh ruh ba tang shu ïoh jingtip halor katei ka jingjia, ka la mih noh na katei ka jaka sah bylla ban leit peit ïa la ka ïing kaba la ingkhong lut khait.
Na ka liang u Bah Donroi Kshiar uba dei u Secretary jong ka shnong Pahamrioh Them, u la ïathuh ba na ka liang jong ki bor shnong tang mar ïa ïoh jingtip halor katei ka jingjia, ki la leit pynsted sha katei ka jaka bad pyntip ruh ïa ki pulit pynlip ding ka Nongpoh Fire & Emergency Service Station.
Wat lada na ka liang ki pulit pynlip ding ki la ïaleh ban poi kloi sha katei ka jaka ban tem ïa ka ding kaba la klang, hynrei la ïohi ba ka ïing jong katei ka longkmie ka la ingkhong lut khait.
Halor kane ka jingjia, ka Hynñiewtrep Achik National Movement (HANM) Nongpoh Circle hapoh ka jingïalam u President, Bah Khrawpyrkhat Thongni, Secretary, Bah Wanteibor Makri ryngkat bad kiwei dkhot lem bad u President ka HANM Ri Bhoi District, u Bah Donroi Kshiar, ki la leit ban ai jingïarap sha katei ka longïing kaba la mad ïa katei ka jingjia kaba sngewsih da ki tiar shet bad bam kum shi bynta ban tynrong lem ïa ka jingeh kaba katei ka longïing ka ïakynduh.
