Shillong, Jylliew 05
Ka National People’s Party (NPP) kaba la rem ha ka ilekshon Lok Sabha na baroh ar tylli ki konstitwensi – Shillong bad Tura – shen kan sa ïakynduh lang ban ïaphylliew jingmut bad phai dien halor ka jingbym lah ka seng ban jop ha kane ka ilekshon sha ka Ïingdorbar Thawaiñ Lok Sabha ha kaba ka Voice of the people party (VPP) ka la jop na Shillong bad ka Congress ka la jop na Tura.
“Ngi pdiang ïa ka rai u paidbah la ka long ha Tura ne Shillong Lok Sabha konstitwensi bad ngi kitbok kitrwiang ruh ïa kine ki MP kiba la shahjied thymmai na baroh ar tylli ki parliamentary konstitwensi bad kyrmen ba kin ïalam ha ka lynti kaba ïadei katkum ka jingangnud ki paidbah,” la ong u President ka NPP Meghalaya Unit u Bah Prestone Tynsong haba ïakren bad ki lad pathai khubor.
U la ong ba shen ka seng kan sa lum jingïalang shen ban ïakren bad khmih bniah ïa ka jinglong-jingman bad ka jingmih na ka jingñiew vote ha kaba yn sa phai dien bad sngewthuh ïa ki daw kiba pynlong ban nym poi sha ka thong ha kane ka ilekshon khnang ba yn lah ban shim ïa ki sienjam kiba long ka jingpynbeit ïa ki jingduna jingbakla.
Halor ka jingrem kput bad jingbym lah ban pynngeit ïa ki paidbah ba kin ai jingkyrshan ïa ki kyrtong ka seng, une u nongïalam ka NPP u la ong ba ha ka ilekshon ka jingrem la ka dei da khyndiat vote ne kham bun vote kam don jingïapher eiei namar shisien ba la rem ka mut ba la rem, bad shisien ba la jop ka dei beit ba la jop,”
U la ong ruh ba baroh ki nongïalam bad nongkitkam ka seng haduh ki Block ki la trei shitom bha bad haba rem ne jop ngi burom ïa ka rai jong u paidbah.
“Ngi hap ban sngewthuh ba haba ngi rem mynta kam mut ba ha ka ilekshon ban sa wan ruh ngin rem. Ym tang ba ngi pdiang ïa ka jingshah rem hynrei ngi hap ruh ban pynkhiah bha ïa ka. Ngin sa khmih bniah bad khmih biang ïa ka rukom treikam bad baroh ha man la ki MLA ne MDC konstitwensi,” u la ong.
Halor ka jingong u President ka VPP u Bah Ardent Basaïawmoit ba baroh ki nongïalam ka Sorkar MDA ki dei ban hiar shuki noh hadien ka jingrem ha ka ilekshon MP, u Bah Prestone u la ong ba ka dei ka jingkren ka bym ïahap bad ka long kum ka jingkren khyllung khynnah bad ka bym ïahap namar naduh ka por ba la ïoh jinglaitluid kum ka ri India, ym ïohi ba kan jia ha kaba kino-kino kiba ïalam ïa ka sorkar kin hap ban hiar shuki noh lada rem ha ka ilekshon MP.
“Nga tharai u President ka VPP u dei ban peit shwa ïa ka histori bad un ai ïa ka nuksa kaba shai kdar lada don kum kata ka jingjia namar ba katkum ka jingtip ka jong nga, kam shym la don kano-kano ka khana naduh ka sngi kaba nyngkong ba la ïoh jinglaitluid ba kan jia kumta ha kino-kino ki jylla ne wat ha ka Sorkar Pdeng ha Delhi” u la ong.
Haba kylli halor ka jingkam ka VPP ba kan mih bujli noh ha ka jaka jong baroh ki seng riewlum kiba don ha Jylla, u Bah Prestone u la ong ba ïa kane u ieh ha ka jingstad jong ki nongthep vote namar lada kren shaphang ka jingmih bujli ha ka kam politik kum ka seng saiñ pyrthei kam don satia kano-kano ka mat jong ka jingkut.
“Ngam don eiei ban ong halor katei ka jingkynthoh namar kan shong ha ka UDP, HSPDP ne kiwei pat ki seng saiñ pyrthei la ki kwah ne me ban leit lang noh bad ka VPP,” u la ong.
Halor ka jingbym lah na ka longïing u nongïalam ba la khlad u Purno Agitok Sangma ban bat ïa ka jinglong MP mynta ka sien na Tura wat haba ka la bat la bun phew snem, u Bah Prestone u la ong ba ka kam saiñ hima sima bad jingjied nongmihkhmat kam dei ka kam shimet kaba longtrai da ka longïing jongno-jongno hynrei ka dei ka kam jong u paidbah bad ka shong ha ka rai u paidbah.
U Bah Prestone u la ong ruh ba u ïaroh ïa ka VPP halor ka jingwanrah jingkylla khlem da donkam pisa ha ka ilekshon bad u ïaroh ïa kane bad ka dei ban bteng ha kiwei ki ilekshon.
“Kawei na ki jingkylla kaba nga ai ka jingïaroh ka long ba ngim donkam ban kren ïa ka pisa. Dei ban long kumne, bad kane ka dei ban bteng bad kan long kumne ha man la ki ilekshon. Sa kawei pat ka jingkylla ban wanrah ka VPP ka dei ka jingkhmih lynti jong ki paidbah namar ka kular ba ka kam Sorkar kan wan wad hi na ïing. Kane ka dei kaba ki paidbah ki ngeit ban sa ïoh kam Sorkar khamtam ha nongkyndong namarba ki ong lada lah ban pynrem ïa ka NPP bad kiwei ki seng kiba don ha ka Sorkar,” la kren kynthoh artad u Bah Prestone.
Hynrei u Bah Prestone u la ong ba na ka liang ka Sorkar ka la ju pynshai ba ka kam Sorkar ka duna bad kam dei kaba suk namar ym lah ban thung kam lut ha kaba ki samla pule kiba pass ki don da ki phew hajar.
