Shillong, Jylliew 05
U MLA bad MDC ka Congress na Nongstoiñ, Bah Gabriel Wahlang, u la ong ba ka jingshah rem u kyrtong ka Congress Bah Vincent Pala ha kane ka ilekshon MP Lok Sabha ka daw ka dei namar ka jingïatreilang bad ka NPP ha KHADC namar ha ïingdorbar thawaiñ ka Congress ka shong ha ka liang pyrshah.
Haba ïakren bad katto-katne ki nongthoh khubor ha KHADC, u Bah Gabriel u la ong ba ki daw ba shah rem ka don ruh ba ka seng kam lah ban pynshai bha ïa ki paidbah ïa ki mat jingkular sha ki paidbah.
U la ong biang ba ka jingkwah ki paidbah ïa ka jingkylla namar ki pynsngewthuh ba ki la jied ïa ujuh haduh lai sien.
Ha kajuh ka por u la ai khublei ïa u Dr Ricky AJ Syngkon uba shah jied kum u MP bathymmai na ka Shillong Parliamentary Constituency bad ïa u Saleng Sangma uba la shah jied na Tura Parliamentary Constituency.
U Bah Gabriel u la ong ruh ban pynkhlaiñ biang ïa ka Congress ha Shillong Constituency donkam ban sngap ka jingai jingmut ki nongtrei ym ban shim rai na Delhi.
U Bah Gabriel u la ong ba mynshwa ka la don ka jingai jingmut ban sngap ïa ki nongtrei lada thung ïa u President ka Meghalaya Pradesh Congress Committee (MPCC), hynrei ka All India Congress Committee (AICC) ka la rai na Delhi ban thung ïa u Bah Vincent Pala kum u President bathymmai.
Namar kata, u don jingkyrmen ba ka Congress kan dang khlaiñ nangne shakhmat namar donkam ïa ki kyrtong bad ïa u nongïalam uba ïohi jngai uba sngap ïa ki nongkitkam jong ka Congress.
