Shillong, Jylliew 05
U Organising Secretary ka Voice of the People Party (VPP) ha East Jaiñtia Hills District bad dkhot ka Central Executive Committee ka VPP Sengkmie u Bah Damewanhi Rymbai u la ong ba ka jingkhlaiñ ka VPP ha Jaiñtia Hills District ka dei namar ki paidbah kim sngewhun ïa ka jingtreikam ka sorkar kaba la ïalam da ka NPP bad UDP.
U la ong ba ka don ka jingtheh pisa ha ka ilekshon MP hynrei ki paidbah ki kwah ban wanrah ïa ka jingkylla namar u kwah ba ka jingkiew jingroi kan long ruh ïa ki shimet shimet. Kum ban shu pynkynmaw u Bah Rymbai u dei u kyrtong ka VPP na Khliehriat constituency ha ka ilekshon MLA uba ïoh tang 800 tam eiei ka ‘vote’. Hynrei mynta ka ilekshon MP u kyrtong ka VPP u ïoh 19,578 vote, katba u kyrtong UDP u ïoh 4,224 ‘vote’ kaba mih khmat da u Bah Kyrmen Shylla uba bat mynta kum u Myntri ha ka Sorkar Jylla.
U la pynpaw ba u Symbud Myntri Rangbah ka jylla, Bah Sniawbhalang Dhar ha Nartiang constituency u la wanrah ïa ki kam pynroi hapoh ka constituency hynrei ki paidbah ki kwah ban wanrah jingkylla ban im jakpoh shimet shimet namar haduh mynta ki ïakynduh jingeh naduh ba la khang u dewïong.
Namar kata, u Bah Rymbai u don jingkyrmen ba ki paidbah ki ïaineh ban kyrshan ïa ka VPP haduh ban da dei ka ilekshon MDC.
