Shillong, Jylliew 05
U Working President ka United Democratic Party (UDP), Bah Paul Lyngdoh bad uba long ruh u Myntri ka Sorkar Jylla, u la ong ba ka jingkhlaiñ jong ka VPP kan ym neh slem namar ka dei ka politik u paidbhur bad ba ka UDP kan sa wan phai biang.
Haba kren sha ki lad pathai khubor ha ka Sngi Balang, u Bah Paul u la ong ba man la ki ilekshon kiba ju long, ki ju don bad pynmih la ki jong ki jingpynkyndit ne ‘Surprise’. Ka jingmih jong ka VPP kum kawei na ki seng riewlum lyngba ka jingjop ïa ka ilekshon MP kaba dang shu dep ka la pynthikna ba ka long ka seng kaba khlaiñ.
U la ong, “Ha ka politik ka ju don ka jingkylla namar kam don kano-kano ruh ka ban neh sah junom, bad kumta wat hadien kane ka jingshah rem, ngin sa wan phai biang da ka jingjop. Baroh ki seng saiñ pyrthei ki ju mad kum kane ka jingïaid lynti jong ka jingkiew bad jinghiar namar kam don kano-kano ruh kaba lah ban shong neh, bad kum ka nuksa ba wat u Myntri Rangbahduh ka Ri u la dep ban kren bad kob lypa ban jop palat 400 ngut hynrei mynta pat u hap ban pyrshang ban thaw ka jingïadei bad kiwei ki seng ban thaw sorkar naba ka BJP kam shym la lah ban ïoh ka jingbun paid marwei.”
“Ka jingjop lyngba u paidbhur kam ju neh slem ha ka politik, kumta kane ka jingkhlaiñ ka VPP ruh kan nym neh slem,” la ong u Bah Paul bad bynrap ba wat la kane ka dei ka jingrem kaba heh ïa ka UDP bad RDA hynrei ka UDP kan sa wan phai biang da ka jingkhlaiñ.
U la pyntip ba na ka liang ki nongïalam ka UDP shen kin sa ïakynduh na ka bynta ban ïathir janai halor kine kiei-kiei baroh namar ka jingshah rem hi ha ka politik ka long tang shipor.
U la ong ruh ba ki don bun ki daw halor ka jingshah rem noh u kyrtong ka RDA u Bah Robertjune Kharjahrin ha kane ka ilekshon MP, ka dei namar ka jingbym shym la ïoh ka por kaba kylluid ban leit ïalap ilekshon, ha kaba u kyrtong u la lah ban mih tang hadien u Kyllalyngkot bad ba ka jingleit ïalap ilekshon ka la long tang ha ki jaka ïew, khlem da lah ban ngam ne leit sha ki shnong ki thaw.
Shuh shuh u la ong ruh ba ka UDP ka dei ka seng kaba rim bad kaba dang khlaiñ, bad ym lah ban shu ong ba tang na ka jingrem ha ka ilekshon MP ba ka la tlot, namar kumba long mynta ka don haduh 12 ngut ki MLA bad ruh ki MDC ha KHADC bad JHADC, kaba pyni ïa ka jingkhlaiñ ka UDP.
