Shillong, Jylliew:
U President ka Voice of the People Party (VPP), u Bah Ardent Miller Basaïawmoit, u la ong ba lada bishar ba peit ïa ka jingïaid lynti jong ka VPP bad kiwei ki seng saiñ pyrthei wat la ym da donkam ban batai hynrei ka don ka jingkylla kaba khraw bha ha kaba la ïohi ba ki paidbah dalade kin leit ban thied ïa ki lama, ki prah bad ki sopti kaba la ïarap lem ïa ki briew kiba ju suhjaiñ bad thaiñ prah ba kin kamai jakpoh.
Haba kren sha ki lad pathai khubor ha madan Polo kaba dei ka jaka ñiew vote ha ka step jong ka 4 tarik u Jylliew 2024, u Bah Ardent u la ong ba ka jingmih jong ka VPP ka la thaw lad- thaw lynti ruh ïa ki briew ba kin ïoh ban kamai jakpoh namar kum ka seng ka khlem ai lama ne pynsuh sopti ïano-ïano kumba la leh lem da kiwei ki seng saiñ pyrthei. Hynrei, na ka liang u paidbah u la leh hi ïa kata ban pynbiang bad kyrshan hi dalade ïalade bad kane ka pyni ba ki paidbah ki la sngewthuh ban jied ïa ka seng bad ïa ki nongïalam kiba ki la angnud ban ïohi.
“Ka jingkamai ka sdang naduh ka jingkhaïi ïa ki prah bad mynta ki la kamai sa da kaba ki la pynmih ïa ki lama namar ka seng ka khlem ai lama ne pynsuh sopti. Kane ka dei ka jingkylla kaba khraw tam kaba nga lah ban ong ha kaba na ka liang u paidbah u leit ba wad nangno ki die lama bad nangno ki die sopti”, la ong u Bah Ardent.
U Bah Ardent u la ong ba ka jingjop u kyrtong ka VPP, u Dr. Ricky A.J Syngkon kam dei ka jingjop kaba shu jia ryngkhat, hynrei kane ka jingjop ka dei ka jingjop kaba shai ba ka jylla Meghalaya kam don shuh ka jingshaniah ïa ka sorkar MDA namar ïa ka ilekshon MP la jop da ki seng kiba shong sha ka liang pyrshah ha kaba wat napoh ka Tura Parliamentary Constituency ruh, u Saleng A. Sangma na ka seng Congress u la ïoh ïa ka jingjop da kaba pynliem lyndang ïa ka kyrtong jong ka seng NPP bad kaba dang dei ruh ka MP na Tura, ka Agatha K. Sangma.
