Shillong, Jylliew 05
Ka Syrpailin Wahlang ka dei khynnah ka bym shym la lait kren naduh ba wan long briew sha kane ka sla pyrthei. Hynrei, kaei kaba la pynkyndit lut ïa baroh ki para khynnah skul bad ïa ki nonghikai jong ka Ferrando Speech and Hearing Centre kaba don ha Umniuh Khwan, Umsning Block, Ribhoi District ka dei namar kane ka khynnah ka la ïoh heh mark ha ka jingkheiñ haduh 84 mark bad wan kyrdan ba ar ha ka eksam Secondary School Leaving Certificate 2024 ba la pynïaid da ka Meghalaya Board of School Education.
Ban tip kham bniah ïa ka jingstad kane ka khynnah skul, U Nongsaiñ Hima na Shillong u la leit ban ïakynduh kyrpang ïa kane ka khynnah ha katei ka skul kaba don ha Umniuh khwan ha ka jingïadonlang ki nonghikai bad ki bahaïing.
Ka Syrpailin Wahlang ka dei na Nongstoiñ bad ka dei ka khun kaba hynñiew na baroh phra ngut shipara. Ka la wan shong skul ha Ferrando Speech and Hearing Centre naduh mynba dang 8 snem karta tad haduh mynta ba ka la pyndep ïa ka matrik.
Namar ba ka Syrpailin kam lah ban kren bad kam shym la ïohsngew, na liang ka nonghikai ka la ïoh ban shong lang ban pyni da ki shympriah kti haba u nongthoh khubor u buh jingkylli khnang ba kane ka khynnah kan lah ban jubab da kaba pyni lang da ki shympriah kti.
Wat la ka Syrpailin ka la ïoh heh bha ha ka jingkheiñ, hynrei kam lah ban leit klas 11 ha ki skul kiba don lang bad ki khynnah kiba biang ki dkhot met namar bym don kiba pyni da ki shympriah kti, pynban ka hap ban bteng biang ha kane ka skul ban shim da ka art.
Ka Syrpai ka la pynpaw ba kam shym don ka jingsngewkyiuh haba ka leit thoh ïa ka eksam matrik bad ki khynnah skul kiba biang dkhot met, bad dei na kane ka daw ba ka lah ban thoh bha.
Haba ïoh ban ïakren bad ka Principal ka Sister Arda Ryntathiang ka la ïathuh ba mynta u snem ki la phah 13 ngut ki khynnah skul bad 12 ngut kiba pas bha, 2 ngut kiba wan ha ka First Division, 2 ngut ha ka Second Division.
Ka la ïathuh ba kane ka skul ka la ïoh jingithuh ha u snem 2016 bad don ki snem kiba pas bha bad don kiba duna kiba pas.
Shuh shuh ka la pyntip ba kane ka skul la seng ha u snem 1996 ha Mawlai Mawroh, hynrei namar ka jingkhapngiah la rah noh sha Umniuh Khwan ha u snem 2002. Ka thong jong kane ka long ban ïarap ïa ki khynnah ki bym lait kren, kiba kyllut bad mynta la shah ruh ban wan pule ïa ki khynnah ki bym lah ban ïaid.
Ha kajuh ka por ka la pyntip ba ïa kine ki khynnah ynda ki la dep jingpule yn hikai ïa ka kam ba ki tbit ban trei khnang ba kin kyrshan dalade ïalade.
