Shillong, Jylliew:
U MLA ka Voice of the People Party (VPP) na Mawlai Constituency, u Bah Brightstarwell Marbañiang u la ong ba ha ka jingïohi jong u kaba paw na ka jingñiew vote ha ka ilekshon MP sha Lok Sabha ka pyni ba u paidbah u la ngiah bad thait ïa ka National People’s Party (NPP) namar la ïohi ba ha Tura bad ha Shillong Parliamentary Constituency, ka NPP ka la shah tam kput ha kiwei pat ki seng saiñ pyrthei.
Haba kren sha ki lad pathai khubor ha ka 4 tarik u Jylliew hajan ka madan kaba dei ka jaka ñiew vote ha Polo, u Brightstarwell u la pynpaw ka jingsngewkmen ba u kyrtong ka VPP, u Dr. Ricky Andrew J. Syngkon u la tam ïa kiwei pat ki kyrtong ha kane ka jingñiew vote.
“Kaba nyngkong eh ka burom ngi ai sha U Blei uba la don ryngkat bad ngi naduh kaba la sdang ïa ka seng bad ha ki jingleit ïalap ilekshon ban pynsngewthuh paidbah bad khamtam ruh ngin nym lah ban klet ïa u paidbah u ba ju ïai don ha syndah jong ngi ban kyrshan ïa ngi. Ngi ngeit skhem ba lyngba kane ka resol kan pyni ba u paidbah ha kylleng ka Ri Khasi u don ryngkat bad ka VPP”, la ong u Bah Brightstarwell.
U Bah Brightstarwell u la ong ba ka resol kaba mih ha kane ka ilekshon MP kaba mynta kan pyni shai kdar ba ki paidbah khamtam hapoh ka Ri Khasi bad Jaiñtia bad wat sha Garo ruh, ki la ngiah shikatdei eh ïa kane ka sorkar Meghalaya Democratic Alliance (MDA) kaba synshar mynta hapoh ka jylla.
“Wat la kane ka dei ka ilekshon MP hynrei ngi sngewthuh ba u paidbah pat u don ka jingdom bad u da long ngiah wat ïa ka sorkar hapoh kane ka jylla jong ngi,” la bynrap u Bah Brightstarwell.
U Brightstarwell u la ong ruh ba kum ka seng ka dap da ka jingsngewnguh ïa ki paidbah kiba la sei haduh 4 ngut ki kyrtong na ka seng ha ka ilekshon MLA. U ngeit skhem ruh ba lyngba ka jingjop ka VPP ïa ka ilekshon MP ha kane ka kynti kaba mynta, kan dei u mawjam ba-ar ha kaba u paidbah un pyni ha kylleng ka ri ba un ïai don ryngkat bad ka VPP.
Haba kylli kum kiei ki sienjam ba ka seng kan shim hadien ba ka la ïoh ïa ka jingjop ha kane ka ilekshon MP ban leit rah sha nongbah Delhi, u Bah Brightstarwell u la ong ba ki don shibun kiei-kiei ki sienjam kiba kum ka seng lyngba ka jingkyrshan jong u paidbah kan dang ïai ïaid shaphrang.
“Ka thong jong ngi ka long ba ngi dei ban synshar ha kane ka jylla ka jong ngi”, la bynrap u Bah Brightstarwell.
