Mawkyrwat, Jylliew 05
U Deputy Commissioner cum Chairman jong ka District Selection Committee, South West Khasi Hills District, Mawkyrwat u la ai ïa ka jingpynbna paidbah katkum ka shithi ba la ïoh na u Secretary jong ka Expert Committee on State Reservation Policy, Meghalaya ba ka sorkar ka la thaw ïa ka Expert Committee ha kaba ïadei bad ka State Reservation Policy.
Ha kane ka expert committee u Justice (Retd.) u MC Garg un long kum u Chairman bad u Justice (Retd) Dr. Satish Chandra, u Prof. DV Kumar, u Prof. Chander Shekhar bad u Prof. Subhadip Mukherjee kum ki dkhot jong katei ka Committee.
Ka jingthmu jong ka Expert committee ka long ban ïaphylliew bad ban shim ïa ki jingai jingmut jong baroh ki paid nongshong shnong da kaba pynlong ïa ka jingpynshai paidbah (Public Hearing) ha ka jylla baroh kawei bad ki district bapher bapher. Kumta la kyntu ïa ki kynhun/ki seng/ ki riewshimet ba lada ki don kino-kino ki jingai jingmut ki lah ban phah da ka jingthoh ha ka ktien phareng ne ka ktien Khasi sha u Bah LK Diengdoh uba long u Secretary jong ka Expert Committee, ha kane ka Address: Personnel & AR (B) Department, Room 513, Meghalaya Civil Secretariat (Main Building), Shillong, Pin Code – 793001 lane Email: [email protected] ha lane shwa ka 15 tarik u Jylliew, 2024.
Kito kiba kwah ban ai ïa ki jingthoh kin phah katkum kine ki jingdonkam kum ka kyrteng jong u ‘riew shimet/ki paid nongshong shnong, ki seng ryngkat ka jaka sah kaba biang ka E-mail bad u phone number jong u/ka/kita ki briew bad u briew uba ai ïa ki jingthoh u dei ban pynshai ba dei u Scheduled Caste/Scheduled Tribe lane kano-kano ka Category. Ki hap ban ai ïa ki daw lane ki jingpynshisha na ka bynta ban pynkylla lane ban ym pynkylla ïa ka Reservation Policy kaba la don lypa, ka ban kyrshan ïa ki jingdawa ryngkat ki kot ki sla ban pynshisha lada don.
Lada la don ki jingai jingmut lane ne jingkynthoh kiba la dep ai ha shwa dei ban bsuh lang bad lada u lane ka nongshong shnong ki la ïoh jingmyntoi ne khlem ïoh myntoi na kane ka Reservation Policy kaba mynta.
Ïa ka tarik jong ka Public Hearing na ka bynta ban pynsngew ia kine ki jingai jingmut/ki jingkynthoh yn sa pyntip paidbah lane da kaba pyntip sha kita ki briew.
