Nongpoh, Jylliew 05
Lai ngut ki rangbah na Ri Bhoi District ki la lait salit na ka kti jong ki nongrahbor ha ka Sngi Balang hadien ba ki la ïoh ban kynthih napoh ka kali jong kitei ki runar kaba dang ïaid ha Nalbari District jong ka jylla Assam.
Katkum ka tyllong khubor na ki pulit, la ïathuh ba ïa kane ka jingjia la pyntip sha ki pulit da ka Kong Kirit Dohtdong, kaba la ïathuh ba u lok jong ka, u Iohborlang Kharsati na ka shnong Mawlang lem bad ar ngut ki paralok jong u, kiba la tip kyrteng kum u Kostarwell Jyrwa na Lumdaitkhla bad u Samsul Ali na Byrnihat ki la mih na ïing ha ka por 7 baje mynstep jong ka Sngi Ba-ar ban leit thied ïa ka puhshilum (JCB) na nongbah Guwahati.
Katei ka longkmie ka la ïathuh ruh ba ha ka por 4 baje janmiet, ki la don ki briew kiba phone sha ka da u number phone jong u lok ban pyntip ba u lok jong ka lem bad ar ngut ki paralok jong u ki la shah rahbor. Kitei ki briew ba phone ki la dawa ruh haduh 7 lak tyngka ban pyllait ïa kitei ki lai ngut.
Na ka liang jong ki pulit ka Ri Bhoi, ha ka step Sngi Balang ha ka por kumba 9:30 eiei, ki la mih da ka kynhun kaba kyrpang ban leit pyllait im ïa kitei ki lai ngut kiba la shah rahbor sha Nalbari District jong ka jylla Assam hadien ba ki la ïoh jingtip ba kitei ki runar ki don ha katei ka jaka bad ai jingtip ruh ïa ki pulit ka Nalbari District.
La ïathuh ruh ba dei tad haduh ka por 3:30 janmiet ba ki pulit ka Ri Bhoi ki la ïoh jingtip ba ki pulit na ka thanat Mukulmua jong ka Nalbari District ka jylla Assam ki la ïoh ban kem ïa ar ngut kiba la suba donkti ha katei ka kam rahbor ïa kiba la tip kyrteng kum u Abdul Aziz bad u Samsul Hoque kiba dei na ka shnong No1 Kaplabori, Nalbari District jong ka jylla Assam ryngkat bad kawei ka kali Ignis ka bym pat don nombor.
Ha ka jingtohkit ki pulit, kitei ki ar ngut ki la phla ba donkti ha katei ka kam bad ïathuh ïa u number phone jong kiwei pat kiba donkti ban rahbor ïa kitei ki lai ngut ki rangbah na Ri Bhoi. Hadien ka jingbuddien ki pulit, la shem ba katei ka kynhun kaba rahbor ïa kitei lai ngut ki dei kiba dang ïaid ha ki bynta jong ka surok bah Tihu National Highway.
Kumta hi mar mar la pyntip ïa kane ka jingjia sha ki pulit ka thanat Tihu ban pynlong ïa ka jingpynapshrip, bad dei ha kane ka por ba kitei ki runar hadien ka jingïohi ïa ka jingpynapshrip jong ki pulit, ki la pyrshang ban pynphai dien ïa ka kali. Dei ha kum kane ka por ruh ba kitei lai ngut ki rangbah na Ri Bhoi ki la ïoh ban kynthih napoh ka kali shabar, katba kitei ki runar, ki la ïoh ban phet krad pat ïalade na katei ka jaka.
Ïa kitei ki lai ngut kiba la lait thaw na kti ki runar, la shimti noh da ki pulit ka Tihu bad aiti sha ki pulit ka Ri Bhoi ban pynpoi pat ïa ki sha la ïing la sem lajong. Ka jingshimkhia bad ka jingstad treikam jong ki pulit ka Ri Bhoi ryngkat bad ki pulit ka Assam ka la pynlong ïa kitei ki lai ngut ki rangbah ban lait na ka kti jong kitei ki runar. La ïathuh ba na liang ki pulit ka Assam ki dang pynlong ïa ka jingthwet jur ban kem ïa kitei ki runar kiba donkti ha kane ka kam rahbor.
