Shillong, Jylliew 05
U President ka National People’s Party (NPP), u Bah Prestone Tynsong uba dei ruh u Symbud Myntri Rangbah ka Jylla, u la ong ba u pdiang sngewbha ïa ka jingong u nongïalam ka Voice of the People Party (VPP) ban phah wan da ka Enforcement Directorate (ED) bad Central Bureau of Investigation (CBI) sha Meghalaya ban tohkit halor ki jingkynnoh bamsap namar ba ka VPP ka la shu kynnoh bamsap lut ïa kiba don ha ka Sorkar MDA.
Haba ki nongthoh khubor ki kylli halor ka jingong u President ka VPP u Bah Ardent Basaiawmoit ban phah da ka ED bad CBI sha Meghalaya, u Bah Prestone u la ong ba kum u President ka NPP ha Jylla bad kum u Symbud Myntri Rangbah u pdiang sngewbha ïa kane, bad u kwah ba ka VPP ka dei ban ong noh ïa u MP ka Shillong ba tang mar ïa sdang ka dorbar Parliament, u dei ban phah noh ïa ka ED bad CBI sha kane ka Jylla ban wan tohkit namar ba ka VPP ka shu kynnoh bamsap lut khlem pynshisha.
U Bah Prestone u la ong ba lada wan kum kine ki kynhun tohkit, ki paidbah ruh kin tip ïa ka jingshisha namar ba ka VPP ka shu kynnoh khlem nongrim la ka dei ïa u Myntri Rangbah u Conrad K Sangma, Prestone Tynsong, Sniawbhalang Dhar bad kiwei ki Myntri ka Sorkar MDA ba ki dei lut kiba tuh bad bamsap.
“U President ka VPP u la ong ba un bthah ïa u MP ba dang shu jop ban pynthikna ba ka ED bad CBI kin wan sha kane ka Jylla bad kum u President ka NPP bad DyCM ha ka Sorkar MDA, ngi pdiang ïa kane namar baroh shikatta ki la ju kren halor ka bamsap bad kynnoh bamsap ïa kiba don ha ka Sorkar. Nga ruh nga la ju pynshai bunsien hynrei i ba ki paidbah kumba ki ngeit ba u Bah Prestone, Conrad ne Sniawbhalang bad baroh ki Myntri Sorkar ki dei kiba bamsap khlem da don ka jingpynshisha,” la ong u Bah Prestone.
Une u nongïalam ka NPP u la ong ba kum uba shahjied ha ki paidbah, u don hangne ban pynthikna ba u shakri na ka bynta ka jingbha jong ka Jylla. “Nga la ïoh la ka tulop, ym ba nga im da ka bamsap, ym ba nga ïoh ïing namar ka bamsap. Lada nga ïoh, ngan ong ïa phi ba ai ba ki briew kin wanrah da ka jingthoh bad pyni ïa nga hangno kata ka bamsap ka don ha ka tnad ba nga bat lane ki lah ban ujor ejahar bad sa ailad ïa ka Ïingkashari ban shim ïa ka jingbishar haduh ba kut” la bynrap u Bah Prestone.
Haba kubur ba u la ïohi ïa ka jingkren u President ka VPP bad pdiang ïa kata, u Bah Prestone u la ong ka bha shibun bad ai ba ki paidbah kin tip hangno ka jia kata ka bamsap bad ai ruh ba ki paidbah kin sngewthuh la kata ka jingkynnoh ba la kynnoh da mano-mano ruh ka dei kaba shisha ne ka bym shisha bad kaba shong nongrim ne em.
“Ai ba ki paidbah kin tip bad ai ba ki Central Agency kin wan tohkit sha kane ka Jylla bad ngi pdiang sngewbha,” u la ong.
U Bah Prestone u la ong ba ka rukom kren jong ki VPP ka long kumba ka CBI ne ED ka don ha pla jong ki ha kaba tang mar ïa jop ïa ka ilekshon MP ka mut ba ki lah ban wanrah bad ka bha ba ki wanrah bad ngi pdiang ban shah tohkit namar ba ki shu lapmiet ban kynnoh bamsap bad kan bha shibun ba ki paidbah kin tip ïa ki jingshisha.
