Shillong, Jylliew 05
U President ka Meghalaya Pradesh Congress Committee (MPCC), Bah Vincent H. Pala ha ka Sngi Balang u la ong ba ka seng kan sa thaw da ka kynhun ban ïa pyrkhat halor kito ki nongmihkhmat kiba la phet noh na ka seng wat la ka jingmynjur kaba khatduh kan hap wan na ki bor ba halor jong ka.
“Kata kam shong ha nga marwei. Haba wan ïalam biang ïa kino-kino kiba la ieh noh ïa ngi khamtam kito ki MLA, ngin hap ïoh jingmynjur shuwa na Delhi,” la ong u Bah Pala haba kren sha ki lad pathai khubor.
U la ong ruh ba ka seng kan sa thaw da ka kynhun ban shim rai halor katei ka bynta namar kane kam shong ha u marwei.
“Ngam don eiei pyrshah ïa kito kiba la ieh noh ïa ka seng, ngin sa shim rai. Ngi biang ka por ha kane ka kynti,” u la ong.
Haba kdew ba ban pynwandur ïa uno-uno nongïalam ka shim por, u President u la pynkynmaw ïa ki por ba la leit kumno u Dr. Mukul Sangma haba u la phet noh ha ryngkat ki 12 ngut ki MLA, u la ïalam lang ïa baroh ki nongtrei ka seng.
“Nga la ïohi ha Ri-lum Garo, baroh ki la mih lut bad ngi la ïoh lad ban pynthymmai ïa ka seng. Hangne ruh, nga sngewthuh ba baroh ki la phet…nga kyrmen skhem ba ka rai na bynta ka MP kam dei kajuh na bynta ka MLA ne MDC,” u la ong.
Ha kajuh ka por, u la ong ba ka seng mynta ka don por sa kumba 4 snem shiteng ha shuwa ban ïoh ïa ka ilelkshon (MLA) bad kan pynbit pynbiang bad pynwandur ïalade watla kiba bun ki la phet noh na ka seng.
“Nga kyrmen skhem ba ha u 2028, ngin sa wan ha ryngkat bun ngut ki MLA namar ngin khlaiñ ha Ri-lum Garo bad ngin pynbit pynbiang ïalade hangne kumjuh,” u la ong.
Haba jubab, u la ïathuh ba kiba bun na kito kiba la ieh noh na ka seng ki dei kiba na Ri-lum Khasi-Jaiñtia bad ki MDC kiba la shah rong noh, ki la ieh noh ïa ka seng ha ka khyllipmat kaba khatduh.
“Kane ka pynduh jingkyrmen ïa ki nongthep ‘vote’, nongtrei bad ka don ka jingsngew ba ka Congress kam khlaiñ shuh. Kumta kane ruh ka la ktah bha ïa ngi,” u la ong.
Shuh shuh utei u nongïalam u la bynrap ba ka sienjam kaba ka seng kan shim nangne shakhmat kan long hadien kumba shi taïew ynda u la wanphai na Delhi.
“Hadien shi taïew lehse. Lashai ngan leit sha Delhi bad u Saleng Sangma ban ïarap ha ka liang ki kot ki sla bad pynithuh ïa u sha ka seng bad ngan sa wan biang. Ngin sdang pynhkreh ïa ka ilekshon ban wan, ngin pynthymmai biang ïa ka seng. Ngin ym pyndem, ngin ym phai dien bad ngin pyntyllun ïa ki kam nangne shakhmat,” la ong u Bah Pala.
