Shillong, Jylliew 05
U MP ka Congress na 1-Shillong Parliamentary konstitwensi uba la shah rem noh ha ka ilekshon sha ka Lok Sabha, Bah Vincent H. Pala u la ong ba kaei kaba la jia ka jia na bynta ka jingbha bad u burom ïa ka rai jong u paid nongshong shnong ka Jylla.
“Ïa kane ka ilekshon la ïakhun ha ryngkat kiba bun ki jingeh. Ki lad jingkyrshan na ka AICC kiba ngi dei ban ïoh, ha kane ka kynti ngim shym la ïoh,” la ong u Bah Pala haba kren sha ki lad pathai khubor ha ka Sngi Balang.
U la pynpaw ruh ka jingsngewnguh ïa ki nongthep ‘vote’ ka Jylla namar ba ki la ‘vote’ ha ryngkat ka jingai rai kaba shai bad kumta u sngew burom ïa ka rai bad ka jingstad jong u paidbah.
“Kum u MP, nga ïohi ba lada uno-uno u ïoh ïa ka rai kaba shai na u paidbah, un don ka mynsiem ban trei. Nga la dep kren ïa u MP, Dr. Syngkon bad ai khublei kitbok kitwriang ïa u. Nga khmih lynti ba un shakri hok ïa ka kam,” la ong u Bah Pala uba la pynpaw ïa ka jingkloi jong u ban synran lang ïa u MP lada u donkam eiei ha Delhi namar ki 15 snem kiba u la don ha katei ka nongbah.
“Hynrei kaei kaba la jia, ka jia na bynta ka jingbha bad ki paidbah ka Jylla ki la ai ïa nga 15 snem bad nga da sngewnguh shi kat dei ïa ki bad nga tikna ba kane ka rai kan ym dei tang ka jingsneng ïa nga, hynrei ka jingsneng ïa baroh,” u la ong.
Haba pynsngew ba u la khmih lynti ïa ka risol, une u khlieh nongïalam ka MPCC u la ong ba ka Sorkar ka la kthong ïa ki briew jong ka seng ha kaba ka la knieh noh ïa kiba bun ki MLA bad MDC.
“Haba nga leit sha ki shnong ki thaw, namar ka ilekshon sha ka ïingdorbar thawaiñ ka Jylla, ilekshon shiteng samoi, ngim da don por than eh ban pynbit pynbiang bad ban kyntiew ïa ki samla, ym kum ha Ri-lum Garo kaba ngi la leh ïa kane bad kumta ngi la poi sha ka thong. Nga sngewnguh ruh ïa ki nongshong shnong ka Ri-lum Garo. Ngi duh uwei bad ngi ïoh uwei,” u la ong.
Shuh shuh u la bynrap ba lada pynbeit ryntih ïa ka seng ha Ri-lum Garo, ki nongshong shnong la kumno-kumno ki dang lah ban ong ba ka Congress ka don ha Ri-lum Garo, katba haba phai sha Ri-lum Khasi-Jaiñtia ka seng kaba don 4 ngut ki MLA kan sa pynbeit ryntih ïalade ha kane ka bynta jong ka Jylla kumjuh.
“Shimet, ngam da sngewsih eh wat la ki nongthep ‘vote’ jong nga kin sngewsih namar ka jingpynïaid jong u Blei ka long na bynta kaba bha,” u la ong.
