Shillong, Jylliew:
U MLA ka North Shillong, Bah Adelbert Nongrum, u la ong ba ka Voice of the People Party (VPP) ka long kum u dieng shaiñ doh kaba ki seng saiñpyrthei ki la kynthoh ha ka por ba dang ïalap ïa ka ilekshon.
Haba ïakren bad u Bah Adelbert hadien ba la jop u Dr Ricky AJ Syngkon kum u MP ka Shillong constituency, u la ong ba kiwei ki seng saiñ pyrthei ki shaniah ha ka “vote bank” hynrei kine baroh ki long lehnohei haba khlaiñ ka sur jong ki paidbah.
U la ong ba ka jingjop ka VPP ka dei namar ki paidbah ki la jlep ïa kine ki seng saiñpyrthei naduh ka Congress, UDP bad NPP kiba la synshar ha kine ki sanphew snem.
U la pynpaw ba ka seng ryngkat u MP ba mynta kin dang buddien ïa kaei kaba la kular namar ka VPP ka jop ïa ka ilekshon khlem da pyndonkam ïa ka pisa.
U Bah Adelbert u la pynpaw ka jingsngewkmen ba ha kane ka ilekshon MP, ka VPP ha North Shillong constituency kaba u mihkhmat kum u MLA ka ‘vote’ ka la kham kiew ban ïa ka ilekshon MLA.
