New Delhi, Jylliew 05
Ka kynhun INDIA ka la rai ban shong shwa ha ka liang pyrshah, la ong u President ka seng Congress, u Mallikarjun Kharge, hadien ba ki nongïalam kane ka kynhun synrop ki la ïakynduh lang ha ka nongbah jong ka Ri.
“Ka INDIA Bloc kan bteng ban pyrshah ïa ka jingsynshar donbor… Ngin shim ïa ki sienjam kiba dei ha ka por kaba dei ban pynurlong ïa ki jingangnud jong ki paidbah ba kim kwah ban shah synshar ha ka BJP,” la ong u Kharge.
Ha kajuh ka por, u Kharge u la ong ba ka kynhun INDIA ka pdiang sngewbha ïa baroh ki seng saiñpyrthei kiba burom ïa ki nongrim jong ka Riti Synshar.
Hynrei u la ong ruh ba ka rai kaba mih na kane ka ilekshon ka long pyrshah ïa u Myntri Rangbahduh, u Narendra Modi. “Ka dei ka jingduhnong ka bakhraw ïa u (Modi) ha ka liang ki kam saiñpyrthei bad ka dei ruh ka jingshah rem (Moral Defeat). Hynrei, ma u pat, u long uba don ka jingmut ban ym burom ïa ka rai jong ki paidbah,” la bynrap u Kharge. Lah ban kdew ba ha ka ilekshon MP Lok Sabha kaba la kut noh ha ka Sngi Ba-Ar, ka BJP marwei ka la jop 240 ngut ki MP. Hynrei ka kynhun NDA ba la ïalam da ka BJP ka don 293 ngut ki MP. Ban ïoh thaw sorkar, ka seng saiñpyrthei ne ka kynhun synrop ka donkam 272 ngut ki MP. Ha kawei pat ka liang, ka kynhun INDIA ka la jop 232 ngut ki MP, bad 99 ngut na kine, ki dei na ka seng Congress.
