New Delhi, Jylliew 05
Ki seng saiñpyrthei kiba don ha ka kynhun synrop jong ka National Democratic Alliance (NDA) ba la ïalam da ka Bharatiya Janata Party (BJP) ha ka Sngi Balang ki la jied biang ïa u Narendra Modi ba un lamkhmat ïa ka kynhun bad la khmih lynti ba ka jingpynbam smai ïa u Modi kum u Myntri Rangbahduh ka Ri kan long ha ka Sngi Saitjaiñ ha Rashtrapati Bhavan.
Ïa katei ka rai la shim ha ka jingïalang ba la pynïaid da u Myntri Rangbahduh ha ka ïing sah jong u ban ïathir halor ki sienjam ba ka NDA ka dei ban shim hadien ba la dep ka ilekshon MP Lok Sabha.
Ha katei ka jingïalang la wan ban ïashim bynta da u Myntri Korbar Ri, u Amit Shah, u President ka Telugu Desam Party (TDP), u N Chandrababu Naidu, u Myntri Rangbah ka Bihar, u Nitish Kumar, bad kiwei, bad ka jingïalang ka la pynmih ïa ka rai.
‘Ki 140 klur ngut ki nongshong shnong jong ka Ri ki la ïohi ba ka Ri ka la kiew ha baroh ki liang ha ki 10 snem ba la leit namar ka sorkar NDA hapoh ka jingïalam jong u Myntri Rangbahduh, u Narendra Modi, ka la wanrah ïa ki kpait saiñ kam kiba pynïoh jingmyntoi ïa ki paidbah.”
“Hadien bun phew snem, kata, la jan 60 snem, ki paidbah ka Ri India ki la jied da u nongïalam uba khlaiñ bad ki la pynkup bor biang ïa u ha ka sien kaba lai.”
“Ngi sngewsarong ba ka NDA ka la ïakhun ïa ka ilekshon Lok Sabha da ka jingïatylli hapoh ka jingïalam jong u Narendra Modi. Namarkata, ngi la rai da kawei ka sur ban jied ïa u Narendra Modi kum u nongïalam ka NDA,” la ong ka rai na katei ka jingïalang.
La khmih lynti ba ka kynhun NDA ka lah ban ïakynduh ïa ka President jong ka Ri, ka Droupadi Murmu ha Rashtrapati Bhavan ha ka Sngi Palei na ka bynta ban kam ban thaw ïa ka sorkar bathymmai.
Kiwei pat ki khubor ki pyntip ba u Modi un bam smai ha ka sien balai kum u Myntri Rangbahduh ka Ri ha ka Sngi Saitjaiñ ha Rashtrapati Bhavan.
Mynta ka sngi, u Modi u la leit ban aiti ruh ïa ka shithi iehnoh kam sha ka President kum u Myntri Rangbahduh hadien ba ka samoi treikam jong u na ka bynta san snem ka la poi sha kaba kut. Ha ryngkat u Modi, ka kynhun Myntri baroh kawei ruh ka la hiar shuki lang. Ka President ka la pdiang ïa ka shithi iehnoh kam jong u Modi bad ka kynhun Myntri, hynrei ka la kyrpad ïa u ba un bteng ha ka kam tad haduh ban da lah ban thaw ïa ka sorkar bathymmai.
Nalorkata, mynta ka sngi, ka kynhun Myntri ka la ai jingmut ïa ka President ban pynwai noh ïa ka Ïingdorbar Thawaiñ Lok Sabha kaba 17 hadien ba ka ilekshon ka la kut noh hynnin ka sngi, bad ka President ruh ka la pdiang ïa kane ka jingai jingmut.
