Nongpoh, Jylliew:
Ka jingñiew ïa ki ‘vote’ na ka bynta ka resol jong ka ilekshon Lok Sabha ha Ri Bhoi kam long satia kaba ishongshit kumba long ha nongbah Shillong, ha kaba la sakhi ba ym don satia ki nongkyrshan jong ki seng saiñ hima kiba wan ban mih paidbah lait noh tang ki nongïalam kiba don bynta ban shim jingkheiñ ïa ka jingñiew ïa ki ‘vote’ hapoh ka Counting Hall.
Kaei kaba kham pher pat ha Ri Bhoi District na kiwei pat ki District ha ka jylla, ka long ba u Deputy Commissioner ka Ri Bhoi District, u Arpit Upadhyaya, u la khang pyrshah ïa ki nongthoh khubor ban rung sha Counting Hall lane ka jaka ñiew ‘vote’ wat lada ki don ïa ki Identity Card kiba ma u kum u District Election Officer (DEO) ka Ri Bhoi u la dep ban soi.
Kane ka jingleh jong utei u DC ka dei ka bym pat ju jia koit ha ki por ilekshon kiba la dep la ka dei ha ka jingjied ïa ki MLA ne ki MP ruh. Ka dei ruh ka sien kaba nyngkong eh ïa ki nongthoh khubor ba la khang ban rung shapoh wat lada ki rah tang u khulom bad ka kopi ban shim jingkheiñ.
Haba pyrshang ban wad jingtip bad kylli pyrthei halor katei ka jingbym shah ban rung ïa ki nongthoh khubor, u DC u la aidaw ba ym shah ïa ki Press ban rung shapoh lait noh tang ha ka jingkhang ban shondur lane ringdur. Kane ka la pynbitar ïa ki nongthoh khubor ka Ri Bhoi naba la shu phah shong ïa ki shabar naduh ka por 8 baje mynstep haduh ka por 12 baje nohphai sngi.
Hadien ba uwei na ki nongthoh khubor u la phah ïa ka jingthoh ban nym lah pdiang ïa kane ka jingkhang pyrshah ïa ki nongthoh khubor lyngba ka Whatsapp, utei u DC hadien kumba katto katne por u la pyntip pat ba la shah ïa ki nongthoh khubor ba kin rung shapoh.
