Shillong, Jylliew 05
U President ka Voice of the People Party (VPP), Bah Ardent M. Basaïaw-moit ha ka Sngi Balang u la ong ba wat la ka la don ka jingpyrshang, hynrei ka seng ka la kren shai ba kan ym lah ban ai ka jingkyrshan ïa ka National Democratic Alliance (NDA) ha ka Sorkar Pdeng.
“Ka la don ka jingpyrshang na ka NDA, ka la don ruh ka jingpynsngew na ka INDIA Bloc, hynrei ngi la kren shai hi…ngi la kren ha katto-katne ki nongïalam kiba la pynpaw na ka liang ka BJP ba kum ka seng, ngi dei ka seng kaba don ïa ka nongrim, te nga tharai kan long kaba eh ïa ngi ba ngin shim ïa ka sienjam ban ai ka jingkyrshan ïa ka NDA,” la ong u Bah Basaïawmoit.
Haba ban biang ïa ka bynta ba ïadei bad ka nongrim, u President u la ong ba ka VPP ka dei ka seng kaba don ïa ka nongrim bad kumta kan ym lah ban ïatreilang bad ki seng saiñ pyrthei ki bym don kajuh ka rukom pyrkhat lane ka nongrim, ha kawei ka liang kaba kdew shai ba ka seng kan ym lah ban ïatreilang bad ka BJP ne ban ai ka jingkyrshan ïa ka NDA.
“Ïa kata la sakhi ba wat ha kane ka Jylla jong ngi, ngi dei ka seng kaba ïeng pyrshah bha ïa ka BJP bad khnang ba ki paidbah kin ym sngewthuh bakla, ka nongrim kaba ngi don kan ym lah ban shah ïa ngi da lei-lei ban ai ka jingkyrshan ne ïatreilang bad ka NDA,” u la ong.
U la kren shai ba naba ka seng kam don ha ka NDA, kumta lada thaw Sorkar ka NDA, ka VPP kan don sha ka liang pyrshah.
Haba kylli la kan pynïasoh ne em sha ka INDIA Bloc, u la ong ba ïa mynta ka seng kam pat shim ïa ka sienjam namar kan hap peit katkum ka jingïaid jong ka por bad ka jingtyllun ki kam.
“Lada ka INDIA Bloc ka donkam ha kano-kano ka khep ïa ka jingkyrshan jong ngi, lada don kano-kano ka jingdonkam ha ïingdorbar Parliament, ka seng kan shong ban pyrkhat bad kan ai katkum ki mat kiba ïakynduh bad katkum ka jingtyllun jong ka por ïa kaba ngin sa peit bad shim ïa ka rai,” la ong u Bah Basaïawmoit.
Shuh shuh utei u nongïalam u la bynrap ba ka seng kam kwah ban shu pynïasoh kumto sha ka INDIA Bloc hynrei kan peit shuwa ïa ki mat kiba ktah ïa ka ri bad ki nongshong shnong kumjuh ïa ki rit paid, bad ban ïeng kumba ju long ha ka nongrim ban ai ka jingkyrshan.
Haba kylli lano u MP ka seng, Dr. Ricky A.J. Syngkon un leit Delhi, u la ong, “Lada ngi la sngewthuh ba kan don ka jingpyntian smai kum u dkhot ka Parliament, ngin sa hiar ha kata ka por, hynrei ïa mynta kam pat dawa kyrkieh than. Ngin sa peit ha kine ki shi sngi ar sngi katkum ki jingpyntip ba ïoh na Parliament.”
