Shillong, Jylliew 05
U Bah Robertjune Kharjahrin uba dei u kyrtong ka Regional Demo-cratic Alliance (RDA) ha ka ilekshon MP sha Lok Sabha bad uba la shah rem noh hadien ka jingpynbna ïa ka resol ha ka 4 tarik u Jylliew ha u kyrtong ka Voice of the People Party (VPP), u Dr Ricky AJ Syngkon, u la ai khublei ïa ki nongïalam ka RDA naduh ki MLA, ki MDC, ki riewpaidbah nongkyrshan bad ki riewshimet kiba la trei shitom wat la u khlem lah ban poi sha ka thong jong ka jingjop.
“Nga sngew ban ainguh ïa u Blei ba u la don ryngkat lang bad ngi kum ka Shillong Parliamentary Constituency haba kam shym la don kano-kano ka huri-hura bad ka ilekshon ruh ka la ïaid beit ïaid ryntih haduh ban da lah ban pyndep ïa kane ka kam”, la ong u Bah Kharjahrin.
Haba ai jingkren sha ki lad pathai khubor shisngi hadien ka jingpynbna ïa ka resol, u Bah Kharjahrin u la ong ba kum u nongïalam bad u nongshakri ïa ki paidbah, u pdiang ïa kaei kaba ki paidbah ki la rai ban pynjop bad u la kitbok kitrwiang ruh ïa u kyrtong ba jop napoh ka Shillong Parliamentary Constituency, u Dr. Ricky Syngkon bad kumjuh ruh ïa u Saleng Sangma uba la jop napoh ka Tura Parliamentary Constituency, ba ki dang ïai lah ban trei kham bha na ka bynta ka jylla baroh kawei.
U la ai khublei kyrpang eh ïa u Dr. Ricky Syngkon u ban dei ka sur ïa ka Jaitbynriew ba un dang lah ban trei shitom ban sngap ïa ka jingangnud ka Jaitbynriew bad ban pyngsngew pat shapoh ka ïingdorbar bah ha Parliament.
“Nga kitbok kitrwiang ba kin trei na ka bynta ka bha ka miat jong ka jylla hi baroh kawei khamtam ïa u Bah Ricky u ban sa long ka sur jong ka Jaitbynriew Hynñiewtrep hapoh ka dorbar Parliament. Nga ngeit skhem ba un lah ban trei shitom ïa ka ban pynsngew ïa ki jingangnud jong ka Jaitbynriew jong ngi hapoh ka dorbar bah Parliament”, la ong u Bah Kharjahrin.
Ha kaba ïadei bad ka jingrung sha ka saiñ hima-sima, u la ong ba ka jingrung jong u kam dei ban shu rung bad ïakhun ïa ka ilekshon hynrei ka long ruh shibynta ban bteng ïa ka jingshakri ïa ka Jaitbynriew. Kumta nangne shakhmat katba u dang ïoh ïa met ka phad kaba shait ba khlaiñ un nang ïai shakri ïa ka jylla bad ka Jaitbynriew hi baroh kawei.
“Ka jingpynïasnoh jong nga sha ka jylli saiñ hima ka dei da kajuh ka jingmut hi kata ka long ban bteng ïa ka jingshakri jong nga ïa ki paidbah bad kumjuh ïa ka jylla hi baroh kawei”, la bynrap u Bah Kharjahrin.
U Bah Robert u la ong ruh ba um pat lah satia ban ong la un dang ïai ïakhun ïa ki ilekshon bapher-bapher ki ban sa wan lane un nym ïakhun shuh hynrei kata baroh ka shong ha ka rai jong baroh lang.
U la ong ba ka jingjied jong u ban leit pynïasnoh bad ka seng United Democratic Party(UDP) ka dei namar ba u don ka jingshaniah bad ka jingieid ïa ki seng riewlum bad ka seng UDP ka dei kawei na ki seng riewlum kaba don ïa ki nongrim bad ki nongïalam kiba biang.
Halor ka jingshah rem ha kane ka ilekshon MP, u Bah Kharjahrin u la ong ba ki don shibun ki daw ban jop ïa ka ilekshon bad ki don ruh shibun ki daw ban rem ïa ka ilekshon. Pynban na ka liang jong u pat, um kwah satia ban kdew kti ne ban kynnoh ïano-ïano hynrei u la shim ïa ka jingkitkhlieh halade ba ka daw ka dei jong u hi.
U la ong ba ka jingshah rem jong u kan nym pynduh mynsiem satia ïa u bad wat la ka don ka jingsngew bynnud namar ka jingbym poi sha ka thong hynrei kan dang ïai ai mynsiem ïa u ba un dang ïai lah ban trei kham bha shuh-shuh nangne shakhmat namar kane ka dei ha ka sien kaba nyngkong eh ba u lah ïakhun ïa ka ilekshon.
“Hynrei na ka liang jong nga, nga shim ïa kane ka jingkitkhlieh ba ka daw ka dei jong nga hynrei kata kan nym dei pat ka jingpynduh mynsiem ïanga”, la bynrap u Bah Kharjahrin.
Shuh shuh u Bah Kharjahrin u la ong ba ka don ruh ka jingsngewsih hadien ba la ïohi ba ki vote ki duna bha bad wat na ka shnong Mawkyrwat kaba dei ka shnong ba u la heh la san bad ai ïa ka jingshakri jong u hynrei ki paidbah katei ka thaiñ pat ki kham sngewtynnad ïa ka seng VPP.
