Jowai, Jylliew:
Ka Synjuk Waheh Chnong Ri-Jaiñtia (SW CRJ) ka la pyntip ba kan pynlong ïa ka jingïalang paidbah (General Meeting) ha District Library Auditorium, Jowai ha ka 8 tarik Jylliew ha ka por 11.00 baje mynstep.
U President ka Synjuk, u Bah A. Lypon u la pyntip ba kane ka jingïalang kan long kaba kyrpang naba yn pyntian smai ïa ki nongkitkam bathymmai jong ka synjuk, kata naduh ki ‘Office Bearer’ bad ki dkhot jong ka EC baroh.
Nalorkata u la pyntip ba ha kane ka jingïalang yn ïakren ruh halor ki mat ki jura hapoh ka imlang sahlang nalor kiwei-kiwei jingdonkam jong ka synjuk bad kumjuh jong ki shnong ki thaw ha baroh 2 tylli ki distrik.
U la pyntip ba nalor ki Waheh Shnong yn donlang ruh u Myntri ka Sorkar Jylla bad MLA ka Khliehriat, Bah Kyrmen Shylla kum u kongsan bad u MDC JHADC, Bah Finelyness Bareh un long kum u Symbud Kongsan.
Kumta ka synjuk ka kyntu bad wer ïa baroh ki Waheh Shnong ka Ri-lum Jaiñtia kynthup na East bad West Jaiñtia kumjuh ki ‘Life Member’ ban pyllait por ban wan sha ka jingïalang khnang ba ka jingthmu jong ka synjuk kan long kaba ïaid beit ïaid ryntih.
